Melania Trump shkëlqen në krah të bashkëshortit, ndërsa zonja e parë shqiptare bie nën pritshmëri
Diplomacia nuk shprehet vetëm përmes marrëveshjeve apo fjalimeve zyrtare; ajo manifestohet edhe në mënyrën se si paraqiten figurat shtetërore në arenën ndërkombëtare. Asambleja e Përgjithshme e Kombeve të Bashkuara, ku morën pjesë udhëheqës e personalitete nga mbarë bota, është një skenë ku çdo detaj ka peshë simbolike. Në këtë kontekst, fotografia e Presidentit të Shqipërisë, Bajram Begaj, me bashkëshorten e tij, krah Presidentit amerikan Donald Trump dhe zonjës së parë Melania Trump, nxori në pah një kontrast të dukshëm mes dy zonjave të para.
Melania Trump, e njohur për shijen e hollë dhe elegancën e përhershme, u shfaq me një kostum të çelët, të thjeshtë por të rafinuar, duke ofruar një model të qartë të finesës dhe seriozitetit që kërkon ky format. Linjat e pastra, harmonia e ngjyrave dhe siguria në qëndrim e kthejnë atë në një simbol të diplomacisë së heshtur, ku imazhi flet më shumë se fjalët.
Në krahun tjetër, zonja e parë shqiptare u shfaq me një veshje që la shumë për të dëshiruar. Fustani i errët, i kombinuar me një pjesë të sipërme kontrastuese, nuk përcolli aspak finesë dhe seriozitet, përkundrazi dha përshtypjen e një zgjedhjeje të improvizuar, larg standardeve të përfaqësimit ndërkombëtar. Në vend që të sillte hijeshi, kjo paraqitje vetëm sa theksoi mungesën e kujdesit dhe të një vizioni të qartë estetik që i shkon rolit të saj.
Ky nuk është thjesht një debat për modën. Bëhet fjalë për mënyrën se si projektohet shteti shqiptar jashtë kufijve. Në një kohë kur imazhi ka peshë po aq sa fjala, një paraqitje e pamenduar mirë jo vetëm që i zbeh figurës së zonjës së parë rëndësinë, por lë edhe Shqipërinë në hije përballë figurave të përgatitura, si Melania Trump, e cila e ka shndërruar stilin në mjet të butë diplomacie.
About the Author
