Dronë ajrorë e tokësorë përdoren për transportin e ushqimit, ujit dhe municioneve, nën kërcënimin e vazhdueshëm të armikut
Në frontin lindor të Ukrainës, lufta ka hyrë në një fazë ku teknologjia po merr gjithnjë e më shumë rol vendimtar. Në rajonin e Pokrovskut, furnizimi i trupave ukrainase nuk kryhet më vetëm nga njerëz, por gjithnjë e më shpesh nga robotë dhe dronë, të cilët përballojnë rrezikun e lëvizjes në atë që ushtarët e quajnë “zona e vdekjes”.
Një shembull i tillë është batalioni “Ujqërit e Da Vincit”, pjesë e brigadës së 59-të të sulmit, ku transporti i municioneve dhe ushqimeve drejt linjës së parë, bëhet përmes dronëve. Në terren, çdo lëvizje është një sfidë e rrezikshme: dronët kamikazë të armikut patrullojnë qiejt dhe një makinë që përpiqet të çajë rrugën është në shënjestër të vazhdueshme.
Gazetarët raportojnë për situata dramatike, ku mjetet e zakonshme të furnizimit shpëtojnë për mrekulli nga shpërthime të afërta, ndërsa ekipet e dronëve detyrohen të lëvizin me shpejtësi nga një pozicion në tjetrin për të shmangur sulmet ajrore. Për ushtarët ukrainas, robotët dhe dronët nuk janë më thjesht inovacion teknologjik, por një mjet mbijetese që bën të mundur furnizimin me ushqim, ujë dhe municione në kushte ekstreme.
Ekspertët theksojnë se kjo formë e logjistikës automatike po shndërrohet në një element të përhershëm të luftës moderne, duke ndryshuar mënyrën se si trupat në front mbijetojnë dhe luftojnë.
About the Author
