Një konflikt i përgjakshëm mes dy fiseve nga Burreli, Hoxha dhe Lleshi, ka nisur më shumë se një dekadë më parë dhe vazhdon ende të prodhojë viktima. Gjithçka lindi nga një krim i rëndë i ndodhur në Angli, për të kaluar më pas në një zinxhir vrasjesh, zhdukjesh dhe ekzekutimesh brenda burgjeve shqiptare.
Historia nisi më 10 prill 2012, kur Arben Lleshi vrau në Angli Agim Hoxhën, vëllain e Aurelit. Pas krimit, trupi i viktimës u dogj brenda një makine, duke shkaktuar tronditje dhe duke ndezur gjakrat mes dy familjeve. Ky atentat u konsiderua si momenti zero i një sagë hakmarrjesh që do të zgjaste për vite me radhë.
Vetëm një vit më vonë, më 30 tetor 2013, hakmarrja do të godiste fisin Lleshi. Xhaxhai i Klevisit, Xhavit Lleshi, u ekzekutua si pjesë e një zinxhiri hakmarrjesh që nisi nga ngjarja në Angli. Përplasja mes dy fiseve nuk u ndal këtu.
Më 15 maj 2016, një tjetër anëtar i familjes Lleshi, Hajredin Lleshi, u vra pranë banesës së tij në fshatin Rukaj të Burrelit. Kjo ngjarje e thelloi edhe më shumë përçarjen, duke e bërë konfliktin të duket i pakthyeshëm.
Në 2017 zhduket pa gjurmë edhe një tjetër i afërm i tyre, Artan Lleshi. Deri më sot, fati i tij mbetet mister, duke shtuar dyshimet se ishte pjesë e hakmarrjes së planifikuar nga pala kundërshtare.
Në gusht të vitit 2020, saga arriti një tjetër kulm tragjik. Klevis Lleshi, vetëm 21 vjeç, u zhduk dhe pas disa kohësh trupi i tij u gjet i groposur në zonën e Shpërdhetit, pranë Mamurrasit. Eshtrat e tij u identifikuan pas disa vitesh, ndërsa hetimet zbuluan se porositësi i vrasjes dyshohet të ketë qenë Aurel Hoxha. Sipas dosjes hetimore, ai kishte paguar 50 mijë euro për ekzekutimin e Klevisit.
Gjaku nuk u ndal as në burg. Në dhjetor 2023, Arben Lleshi, i dënuar me burgim të përjetshëm për vrasjen e Agim Hoxhës, u qëllua për vdekje brenda qelisë në burgun e Peqinit. Autor i ekzekutimit ishte i dënuari tjetër përjetë, Sokol Mjacaj. Edhe kjo vrasje shihet si pjesë e të njëjtës hakmarrje që prej vitesh përfshin dy fiset.
Hetimet e fundit e kanë trajtuar këtë sagë si një çështje tipike të kriminalitetit të organizuar, ku përfshihen vrasje me pagesë, fshehje kufomash, pastrim parash dhe kërcënime të hapura për shuarjen e një fisi të tërë. Emra si Aurel Hoxha, Sabah Nuzi, Samet Loka dhe Sajmir Kolaveri janë përmendur në dosjet e drejtësisë si pjesë e ekzekutimeve dhe planifikimeve kriminale.
Saga e hakmarrjes mes Hoxhajve dhe Lleshajve është shndërruar kështu në një histori të gjatë gjaku, ku viktimat më të shumta kanë qenë nga fisi Lleshi. Nga Anglia, tek Burreli, Mamurrasi e deri brenda mureve të burgut të Peqinit, kjo armiqësi ka treguar se gjakmarrja dhe krimi i organizuar, kur bashkohen, prodhojnë tragjedi që zgjasin brez pas brezi.
About the Author
