Avioni SF-260 i 70-të Stormo u përplas gjatë një fluturimi stërvitor në Parkun Kombëtar të Circeo; autoritetet nderojnë viktimat dhe shpallin anulimin e fluturimit të Frecce Tricolori në Milano
Një aksident i rëndë ajror ka ndodhur këtë të mërkurë në Sabaudia, provinca e Latinës, ku një avion stërvitor i Forcave Ajrore Italiane u rrëzua brenda Parkut Kombëtar të Circeo, duke shkaktuar vdekjen e dy personave në bord. Viktimat janë koloneli Simone Mettini, 48 vjeç, komandant i 70-të Stormo në Latina, dhe kadeti Lorenzo Nucheli, vetëm 20 vjeç, i cili po përgatiste licencën e parë të fluturimit.
Sipas njoftimit të Forcave Ajrore, avioni SF-260 ishte në një mision stërvitor kur humbi kontaktin me radarët. Rrënojat u gjetën pas kërkimeve intensive nga zjarrfikësit dhe një helikopter i ushtrisë. Raportimet paraprake tregojnë se pas përplasjes në pyll, avioni mori flakë, duke e bërë të pamundur mbijetesën e ekuipazhit.
Autoritetet italiane kanë shprehur ngushëllime të thella. Presidenti Sergio Mattarella deklaroi: Me trishtim të madh mora lajmin e humbjes së dy ushtarakëve që kryenin me përkushtim detyrën e tyre.
Edhe kryeministrja Giorgia Meloni dhe ministri i Jashtëm Antonio Tajani kanë shprehur dhimbje për këtë tragjedi, duke u solidarizuar me familjet e viktimave dhe Forcat Ajrore. Në sallën e Parlamentit u mbajt një minutë heshtje, ndërsa Forcat e Armatosura shprehën nderim për dy ushtarakët.
Në shenjë zie dhe respekti, u anulua fluturimi i planifikuar i Frecce Tricolori mbi Milano, që ishte parashikuar për festimet e 100-vjetorit të Aeronautikës Ushtarake Italiane.
Koloneli Mettini, me karrierë të gjatë në ushtri dhe baba i dy fëmijëve, kishte marrë prej pak kohësh drejtimin e 70-të Stormo-s, shkollës ku përgatiten të gjithë pilotët ushtarakë italianë. Ndërkohë, kadeti Nucheli ishte në fillimet e rrugëtimit të tij ushtarak, plot ëndrra për të ardhmen në Forcat Ajrore.
Hetimet për shkaqet e rrëzimit janë në vijim, ndërsa komuniteti ushtarak dhe qytetarët e zonës kanë shprehur tronditjen e tyre për ngjarjen tragjike.
About the Author
