Shefi i Tesla-s dhe SpaceX ndez polemika të reja duke akuzuar Netflix për “agjendë woke transgjinore”, ndërsa analistët thonë se bojkoti nuk pritet të ketë ndikim serioz tek kompania.
Elon Musk ka shkaktuar një tjetër furtunë në rrjetet sociale këtë javë, pasi u bëri thirrje ndjekësve të tij që të anulojnë abonimet në Netflix. Shkaku lidhet me polemikat mbi një serial të animuar të platformës, “Dead End: Paranormal Park”, i cili përfshinte një personazh transgjinor.
Në një postim në platformën e tij X, Musk shkroi: “Anuloni Netflix për shëndetin e fëmijëve tuaj”, duke e shoqëruar me akuza se kompania po promovon një “agjendë transgjinore woke”. Reagimi erdhi pas qarkullimit të një imazhi dhe disa postimesh nga llogari konservatore që akuzonin krijuesin e serialit, Hamish Steele, se kishte bërë komente fyese për aktivistin konservator Charlie Kirk.
Steele reagoi në rrjetin rival Bluesky, duke thënë: “Do të jetë një ditë e çuditshme”, ndërsa mbrojti serialin si një vepër për “personazhe të ndjeshëm dhe të dashur”.
Megjithëse aksionet e kompanisë kanë rënë rreth 4% këtë javë, analistët theksojnë se thirrjet e Musk nuk pritet të shkaktojnë dëme serioze. Netflix ka mbi 301 milionë abonentë globalisht, një kapital tregu rreth 490 miliardë dollarë, dhe është rritur mbi 60% gjatë vitit të fundit.
“Kjo nuk është një arsye për të shitur aksionet,” deklaroi Guy Adami nga CNBC, duke shtuar se bojkoti madje mund të prodhojë efekt të kundërt, duke sjellë abonime të reja në shenjë kundërshtie. Edhe ekspertë të tjerë si Alicia Reese nga Wedbush Securities dhe Tim Seymour nga Seymour Asset Management theksuan se efektet do të jenë kalimtare dhe pa ndikim afatgjatë.
Thirrja për bojkot sjell ndër mend rastin e Bud Light në vitin 2023, kur marka e birrës humbi miliarda pas fushatës me influencuesen transgjinore Dylan Mulvaney. Por sipas analistëve, rasti i Netflix është ndryshe dhe nuk pritet të ketë të njëjtën shkallë dëmi.
About the Author
