Postimet virale që flasin për përplasje me Tokën ose sondë aliene janë të pasakta. 3I/ATLAS është vizitor ndëryjor që do të kalojë qindra milionë km larg nesh.
Që nga 29 shtatori, portale dhe rrjete sociale kanë përhapur pretendime se një kometë gjigante po vjen drejt Tokës, madje edhe se mund të jetë teknologji aliene. Artikuj sensacionalistë e shtynë valën e spekulimeve, që më pas u ripërsërit në X/Twitter.
3I/ATLAS është një objekt ndëryjor i zbuluar nga teleskopi ATLAS më 1 korrik 2025. NASA dhe ESA theksojnë se nuk është në trajektore përplasjeje me Tokën dhe do të qëndrojë shumë larg planetit tonë. Vlerësimet flasin për një kalim rreth 269–270 milionë km nga Toka, ndërsa matje të tjera e vendosin edhe më larg; në çdo rast, bëhet fjalë për qindra milionë kilometra distancë. Afrimi më i madh me Diellin pritet në fund të tetorit 2025, rreth 210 milionë km nga Dielli, brenda orbitës së Marsit. Vëzhgimet e Hubble tregojnë shpejtësi afërsisht 210 mijë km/orë dhe një bërthamë me kufij të mundshëm nga rreth 440 metra deri në 5.6 km. Më 21 korrik 2025, kometa ishte rreth 446 milionë km larg Tokës, duke kundërshtuar pretendimet se po vjen drejt nesh.
Nuk ka prova që 3I/ATLAS të jetë anije kozmike aliene apo se ndonjë agjenci po përgatitet për ndërhyrje ushtarake për ta ndalur. Citimet që i atribuohen fizikantit Michio Kaku janë të rreme; videoja që qarkullon është nga një intervistë e mëparshme, para zbulimit të 3I/ATLAS.
Për të shmangur panikun, mbështetuni te burimet zyrtare (NASA/ESA dhe observatorë të njohur), kontrolloni distancat reale që publikohen për objektet qiellore dhe kushtojini vëmendje datave astronomike (afrimi me Diellin dhe kalimet më të afërta).
About the Author
