Kompania ajrore konfirmon rrjedhjen e informacionit, pas një hakerimi që përfshiu edhe gjigantë si Google, Toyota dhe Disney
Një nga rrjedhjet më të mëdha të të dhënave në historinë e industrisë ajrore ka tronditur Australinë këtë fundjavë. Kompania kombëtare ajrore Qantas ka njoftuar se informacionet personale të 5.7 milionë klientëve janë publikuar në internet, pas një sulmi kibernetik të ndodhur në korrik ndaj një sistemi të përdorur nga një palë e tretë.
Sipas Qantas, hakerët kanë arritur të marrin emrat, adresat e emailit, numrat e telefonit dhe datat e lindjes së klientëve, por jo të dhënat e pasaportave apo kartave bankare. Sulmi është kryer përmes platformës Salesforce, e cila përdoret nga shumë kompani të mëdha për menaxhimin e të dhënave të klientëve.
Një burim i afërt me hetimin ka konfirmuar për agjencinë AFP se ky sulm ka prekur dhjetëra kompani ndërkombëtare, përfshirë Air France, KLM, Google, Disney, Ikea, Toyota dhe McDonald’s.
Ekspertët e sigurisë kibernetike dyshojnë se pas këtij sulmi qëndron grupi kriminal “Scattered Lapsus$ Hunters”, i cili kishte kërkuar pagesën e një shpërblimi para se të publikonte të dhënat në dark web.
Faqja e specializuar FalconFeeds njoftoi se informacionet e klientëve të Qantas, bashkë me ato të Vietnam Airlines dhe Fujifilm, u publikuan në internet gjatë fundjavës.
Kompania Qantas deklaroi se po punon me ekspertë të sigurisë për të përcaktuar saktësisht cilat të dhëna janë ekspozuar dhe për të forcuar sistemet mbrojtëse. “Ajo që po ndodh është një sfidë globale për të gjitha kompanitë që përdorin platforma të ndërlidhura të të dhënave. Ne po bëjmë çdo përpjekje për të mbrojtur klientët tanë,” thuhet në deklaratën zyrtare.
Australia ka qenë në shënjestër të një sërë sulmesh kibernetike vitet e fundit. Në vitin 2023, portet kryesore të vendit u mbyllën përkohësisht pas një ndërhyrjeje hakerash, ndërsa një vit më parë kompania e telekomunikacionit Optus pësoi rrjedhjen e të dhënave të mbi 9 milionë klientëve.
Ngjarja e fundit ka ringjallur shqetësimet për sigurinë digjitale dhe mbrojtjen e privatësisë në vend, ndërsa autoritetet australiane kanë premtuar një reformë të re ligjore mbi menaxhimin e të dhënave personale dhe përgjegjësinë e kompanive në rast të sulmeve të tilla.
About the Author
