Një tjetër akuzë e rëndë është ngritur ndaj Presidentit të Republikës, Bajram Begaj. Partia Demokratike ka zbuluar se Kreu i Shtetit, përveç detyrës së tij zyrtare, rezulton të jetë i punësuar edhe në një spital privat, në shkelje të drejtpërdrejtë të Kushtetutës.
Kreu i grupit parlamentar të PD-së, Gazment Bardhi, deklaroi se Begaj mban njëkohësisht dy poste, atë të Presidentit dhe të konsulentit mjekësor në spitalin privat “Acibadem”. Sipas Bardhit, ky është “një veprim i paprecedentë” që cenon parimin e ndarjes së funksioneve publike dhe bie ndesh me ndalimin kushtetues për ushtrimin e çdo veprimtarie tjetër fitimprurëse gjatë mandatit presidencial.
Të dhënat e publikuara në “Open Spending Data” tregojnë se në vitin 2023, Begaj ka përfituar 1,605.52 euro nga spitali “Acibadem”, ku figuron si konsulent mjekësor. Përveç kësaj, në formularin e deklarimit të pasurisë për vitin e kaluar, ai ka raportuar 3,234,215 lekë pagë si President dhe 6,600 euro në formë dietash për aktivitetet zyrtare jashtë vendit.
Sipas opozitës, ky është një rast i qartë i konfliktit të interesit dhe përbën bazë për nisjen e procedurave të shkarkimit të Presidentit. “Asnjë President në historinë e vendit nuk ka ushtruar aktivitet privat gjatë ushtrimit të mandatit. Ky është një precedent i rrezikshëm për institucionin e Kreut të Shtetit,” u shpreh Bardhi.
Zyra e Presidentit ende nuk ka dhënë ndonjë reagim lidhur me këto akuza, ndërsa PD ka paralajmëruar se do t’i dorëzojë Kuvendit dokumentacionin zyrtar që, sipas saj, provon shkeljen kushtetuese.
About the Author
