Pas disa ditësh në qeli, avokati Ulian Bajrami ka folur publikisht për herë të parë, duke e quajtur arrestimin e tij të paligjshëm dhe duke akuzuar prokurorin e çështjes për manipulim dhe sjellje të pahijshme gjatë seancës në Gjykatën e Elbasanit.
Vetëm pak orë pasi u lirua me urdhër të Prokurorisë, avokati Ulian Bajrami foli në emisionin Top Story për ngjarjen që tronditi sallën e gjyqit në Elbasan, ku ai u përplas ashpër me prokurorin e çështjes gjatë një seance masash sigurie. Ai tha se gjithçka nisi kur konstatoi mospërputhje mes akteve hetimore dhe dokumenteve të paraqitura nga prokuroria.
Sipas Bajramit, pamjet filmike të kamerave të sigurisë, të shfaqura në sallë rrëzuan pretendimet e akuzës dhe provuan se klienti i tij nuk kishte kundërshtuar policinë gjatë arrestimit, siç pretendonte prokurori. Ai tha se gjykata konstatoi pasaktësi serioze në procesverbal, por në vend që të korrigjonte gabimet, prokurori u përpoq t’i justifikonte ato.
Prokurori mezi lexonte dhe u përpoq të sajonte justifikime, u shpreh Bajrami, duke shtuar se kishte vepruar në mënyrë të qetë dhe ligjore gjatë seancës, por që përballë fakteve të qarta, prokurori reagoi me tone kërcënuese. Ai tha se gjyqtarja e seancës nuk arriti të menaxhonte situatën, çka përfundoi me tension dhe ndërprerjen e procesit.
Pas incidentit të së premtes, Bajrami u thirr në komisariat të shtunën dhe u arrestua, por u la i lirë më vonë, pasi prokuroria nuk kishte asnjë bazë ligjore për ta mbajtur në qeli. Ai e quajti masën një akt arbitrar, që synonte ta frikësonte për denoncimin e parregullsive në sistem.
Unë nuk bëj kallëzime ndaj kolegëve, por ky rast tregoi qartë se kush gënjente dhe kush manipulonte hetimin, tha Bajrami, duke shtuar se do ta ndjekë çështjen deri në fund për të zbardhur të vërtetën.
Pamjet filmike që dolën në sallë, sipas tij, janë prova më e fortë se klienti i tij ishte i pafajshëm dhe se problemi qëndronte tek mënyra si u mbajt dhe u interpretua procesverbali nga prokuroria. Hetimet për incidentin dhe akuzat reciproke mes palëve pritet të vazhdojnë në ditët në vijim.
About the Author
