Deputeti demokrat kërkon përgjegjësi nga kreu i opozitës dhe paralajmëron se PD rrezikon të humbasë legjitimitetin nëse nuk përmbush kauzën për rivotim pas akuzave për manipulime në zgjedhjet e 11 majit.
Në Partinë Demokratike po shfaqen shenjat e para të pakënaqësive të hapura ndaj lidershipit aktual. Deputeti Besart Xhaferri ka kërkuar publikisht që Sali Berisha të marrë përgjegjësi të plotë për premtimet e bëra pas zgjedhjeve të 11 majit dhe të nisë menjëherë procesin për përsëritjen e tyre. Në të kundërt, sipas tij, Berisha duhet të largohet nga drejtimi i PD brenda vitit 2026.
Xhaferri gjithashtu tha se PD nuk mund të braktisë kauzën e zgjedhjeve të manipuluara dhe se partia duhet të ruajë kredibilitetin përballë qytetarëve përmes veprimit konkret, jo vetëm retorikës politike. “Nëse zgjedhjet nuk përsëriten, atëherë Berisha nuk ka pse të vazhdojë ta drejtojë partinë. Kauza e votës së lirë nuk mund të shuhet mes heshtjes apo kompromisit politik,” deklaroi ai.
Deputeti theksoi se mandati i Berishës përfundon në prill 2026 dhe se deri atëherë, duhet të organizohen zgjedhje të reja për drejtimin e partisë. Ai u shpreh se do të vazhdojë betejën brenda strukturave demokratike, pa synuar përçarje, por me qëllimin për ta rikthyer PD në rrugën e transparencës dhe garës së brendshme.
Deklarata e Xhaferrit ka marrë jehonë të gjerë, sidomos pasi është shpërndarë edhe nga “Rilindja Demokratike”, organi zyrtar i partisë, një veprim që ka ngjallur diskutime për qëndrimin e redaksisë dhe për tensionet e brendshme në PD.
Në të njëjtën kohë, brenda strukturave të partisë janë vënë re edhe ndryshime të dukshme në balancat e influencës. Belind Këlliçi, një nga figurat më të njohura të opozitës së re, duket se është lënë në hije, ndërsa protagonizmin e ka marrë Ilir Alimehmeti, i cili po shfaqet në skenë përkrah figurave të reja si Florian Binaj.
Këto zhvillime po interpretohen nga shumë analistë si sinjale të një rebelimi të qetë brenda Partisë Demokratike, një fazë e re tensioni që mund të hapë rrugën për një përballje të fortë mes brezave politikë dhe përpjekjeve për riformatim të opozitës shqiptare.
About the Author
