Ish-ministri i Mjedisit i përfshirë në aferën e inceneratorëve i drejtohet Gjykatës me kërkesë për t’u liruar pas tre vitesh qëndrimi në burg.
Lefter Koka, ish-ministër i Mjedisit dhe një nga personazhet kryesore në dosjen e bujshme të inceneratorëve, ka kërkuar sot nga Gjykata e Posaçme që t’i hiqet masa e sigurisë “arrest me burg” dhe të lirohet. Përmes avokatëve të tij, Koka ka argumentuar se ka qëndruar tashmë tre vite në paraburgim dhe se kjo periudhë tejkalon çdo afat të arsyeshëm në raport me ecurinë e procesit gjyqësor.
Në kërkesën e depozituar, ish-ministri thekson se ka bashkëpunuar me drejtësinë, se është në gjendje të rënduar shëndetësore dhe se nuk ekziston më asnjë rrezik për prishje të hetimeve apo ndikim në proces.
Koka u arrestua në dhjetor të vitit 2021 nga SPAK, nën akuzat për korrupsion, shpërdorim detyre dhe pastrim parash, si pjesë e hetimeve për aferën e inceneratorëve të Fierit dhe Elbasanit, një ndër dosjet më të rëndësishme të dekadës së fundit.
Pavarësisht kërkesave të përsëritura për lirim, deri më sot gjykata ka refuzuar disa herë ndryshimin e masës së sigurisë. Vendimi për kërkesën e fundit të Lefter Kokës pritet të jepet në ditët në vijim.
About the Author
