E reja filipinase me mbi 860 mijë ndjekës në TikTok është ndarë papritur nga jeta në Los Anxhelos. Familja dhe fansat e saj në mbarë botën janë tronditur nga lajmi tragjik.
Tronditje në rrjetet sociale pas vdekjes së papritur të Emman Atienza, yllit të njohur filipinas të TikTok, e cila ndërroi jetë në moshën 19-vjeçare në banesën e saj në Los Anxhelos.
Lajmin e ka bërë publik familja e saj nëpërmjet një deklarate të ndjerë. Prindërit, Kim Atienza, prezantues i njohur televiziv, dhe Felicia Hung, biznesmene, kanë njoftuar ndarjen e vajzës së tyre të dashur me fjalë prekëse:
Me dhimbje të thellë ndajmë lajmin për ndarjen e papritur nga jeta të vajzës dhe motrës sonë, Emman. Ajo solli dritë, dashuri dhe gëzim në jetët tona dhe në jetën e kujtdo që e njihte.
Familja theksoi gjithashtu se Emman kishte folur shpesh hapur për sfidat e saj me shëndetin mendor, duke ndihmuar shumë të rinj të ndiheshin më pak vetëm. Në kujtim të saj, shpresojmë të mbartni vlerat që ajo mishëronte; dhembshuri, guxim dhe pak më shumë mirësi çdo ditë, shkruhet më tej në mesazhin e familjes.
Shkaku i vdekjes nuk është bërë publik, pasi autoritetet po zhvillojnë hetimet.
Emman Atienza kishte krijuar një ndjekje të madhe në rrjete sociale: më shumë se 866 mijë ndjekës në TikTok dhe 224 mijë në Instagram. Ajo njihej për videot plot energji, stilin e veçantë dhe mesazhet frymëzuese për pranimin e vetvetes dhe pozitivitetin trupor.
Videoja e saj e fundit, postuar vetëm tre ditë para vdekjes, e tregonte duke qeshur me miqtë, duke kërcyer, notuar dhe ngjitur shkëmbinj, një moment që sot ndjehet si një përshëndetje e fundit për ndjekësit e saj.
Në rrjete, fansat kanë mbushur profilin e saj me mesazhe ngushëllimi:
E pabesueshme që je larguar… ishe gjithmonë plot dritë dhe gëzim, shkruan një ndjekës.
Një tjetër shton: Nuk të kam njohur kurrë personalisht, por videot e tua më ndihmuan të kapërcej ditët më të errëta. Faleminderit që na bëre të buzëqeshim.
Agjencia e saj, Sparkle GMA Artist Center, ka shprehur ngushëllimet për humbjen e artistes së re:
Emman do të mbetet gjithmonë pjesë e familjes sonë. Kujtimi i saj do të ndriçojë përherë ekranin dhe zemrat tona.
About the Author
