Shtëpia e Bardhë ka konfirmuar takimin mes presidentit amerikan Donald Trump dhe liderit kinez Xi Jinping, që do të mbahet më 30 tetor në prag të samitit ekonomik të APEC në Gyeongju, Korenë e Jugut.
Presidenti i Shteteve të Bashkuara, Donald Trump, do të zhvillojë një takim dypalësh me presidentin e Kinës, Xi Jinping, javën e ardhshme në Korenë e Jugut. Lajmi është konfirmuar nga zëdhënësja e Shtëpisë së Bardhë, Karoline Leavitt, e cila njoftoi se takimi do të mbahet mëngjesin e 30 tetorit, përpara se Trump të rikthehet në Uashington.
Takimi pritet të ndodhë në kuadër të samitit të Bashkëpunimit Ekonomik të Azisë dhe Paqësorit (APEC), që do të mbahet në qytetin Gyeongju më 31 tetor dhe 1 nëntor. Ende nuk është bërë e qartë nëse presidenti amerikan do të marrë pjesë në vetë samitin, megjithatë Shtëpia e Bardhë e ka përfshirë ngjarjen në itinerarin e tij aziatik.
Trump e konfirmoi personalisht takimin me Xi gjatë një deklarate për mediat, ku theksoi se të dyja vendet do të diskutojnë tensionet tregtare dhe çështje të tjera ekonomike. Ai u shpreh se shpreson që ky takim të shërbejë për të zgjidhur shumë pikëpyetje që kanë lindur pas muajsh përplasjesh tarifore midis SHBA dhe Kinës.
Takimi vjen në një moment kur marrëdhëniet mes dy fuqive janë përshkallëzuar. SHBA ka vendosur tarifa 30 për qind mbi importet kineze dhe ka paralajmëruar masa të reja nëse nuk arrihet një marrëveshje. Trump gjithashtu pritet t’i kërkojë Xi-t të ndalojë kompanitë kineze nga blerja e naftës ruse, pasi Uashingtoni vendosi sanksionet e para kundër Moskës që prej kthimit të tij në Shtëpinë e Bardhë.
Sipas planit të publikuar nga Leavitt, Trump do të nisë turin e tij aziatik të premten në mbrëmje, me ndalesën e parë në Malajzi, ku do të marrë pjesë në samitin e ASEAN. Ai do të takohet me kryeministrin malajzian dhe do të marrë pjesë në darkën e liderëve të rajonit.
Më pas, të hënën do të udhëtojë drejt Tokios për një takim me kryeministren japoneze Sanae Takaichi, ndërsa më 29 tetor do të vizitojë Korenë e Jugut për të zhvilluar takime me presidentin Lee Jae Myung dhe për të mbajtur një fjalim në drekën e APEC.
Autoritetet koreane kanë bërë të ditur se takimet e Trump me Xi dhe me Lee do të mbahen në Gyeongju, qytetin ku zhvillohet samiti, ndërsa Shtëpia e Bardhë nuk ka konfirmuar ende vendndodhjen e saktë të takimit SHBA-Kinë.
Zyrtarët në Seul shpresojnë që këto takime të ndihmojnë në forcimin e rolit të Koresë së Jugut si ndërmjetëse në dialogun rajonal dhe në gjetjen e një konsensusi për paqe dhe stabilitet në rajonin e Paqësorit.
About the Author
