Pas javësh hetimesh dhe analizimi të pamjeve filmike, policia e Durrësit ka vënë në pranga një 37-vjeçar nga Tirana, i dyshuar si autor i disa vjedhjeve me thyerje automjetesh në qytetin bregdetar.
Një seri vjedhjesh që kishte shqetësuar qytetarët e Durrësit është zbardhur nga policia, e cila ka arrestuar autorin e dyshuar, një 37-vjeçar nga Tirana që vepronte në mënyrë të përsëritur në zona të ndryshme të qytetit. Operacioni, i koduar “Refleksi”, u finalizua pas një pune të gjatë hetimore dhe verifikimeve të pamjeve të siguruara nga kamerat e sigurisë.
Sipas burimeve zyrtare, i arrestuari me inicialet V. K. lëvizte me biçikletë në lagjet 6, 8 dhe 12 të Durrësit, ku zgjidhte makina të parkuara, thyente xhamat dhe vidhte para, laptopë dhe sende personale. Më pas, ai përdorte një automjet të tijin për të transportuar dhe fshehur objektet e grabitura.
Policia arriti ta ndalonte 37-vjeçarin në momentin që po përgatitej të kryente një tjetër vjedhje, duke e kapur në flagrancë. Hetimet kanë zbuluar se ai është autor i të paktën pesë vjedhjeve të kryera gjatë muajve të fundit, ndërsa dyshohet për disa raste të tjera që po verifikohen.
Në komunikatën zyrtare, policia thekson se operacioni “Refleksi” u zhvillua në bashkëpunim me Prokurorinë e Durrësit, e cila po vijon procedurat për dokumentimin ligjor të të gjitha veprave penale të dyshuara.
Materialet i janë referuar Gjykatës së Shkallës së Parë të Juridiksionit të Përgjithshëm Durrës, ndërsa hetimet pritet të zgjerojnë rrjetin e vjedhjeve ku mund të ketë qenë i përfshirë 37-vjeçari.
About the Author
