Prokuroria e Tiranës ka përfunduar hetimet për tre efektivë të sigurisë në IEVP “Jordan Misja”, të cilët akuzohen se me neglizhencën e tyre mundësuan tentativën e arratisjes së dy të dënuarve në gusht 2021.
Prokuroria pranë Gjykatës së Shkallës së Parë të Juridiksionit të Përgjithshëm në Tiranë ka dërguar për gjykim tre punonjës të burgut të njohur si “313”, me akuzën e shpërdorimit të detyrës, pas ngjarjes së tentativës për arratisje të dy të burgosurve, Arbër Çekaj dhe Fatmir Pjetri.
Të pandehurit janë identifikuar si Radion Maloku, Bashkim Muça dhe Oldi Myzyri. Sipas hetimeve të Prokurorisë, më 8 gusht 2021, dy të burgosurit tentuan të arratiseshin duke zbritur nga tarraca e godinës “A” me një litar të improvizuar nga çarçafët, por u ndaluan në oborr nga forcat e sigurisë.
Hetimet zbuluan se përpara ngjarjes, tre punonjësit e shërbimit nuk kishin kryer kontrollin fizik të detyrueshëm ndaj të paraburgosurit Fatmir Pjetri, i cili kishte me vete një çantë që përmbante sende të ndaluara, të përdorura më pas për tentativën e arratisjes. Pamjet filmike të siguruara nga kamerat e institucionit konfirmuan mungesën e çdo kontrolli në momentin e hyrjes së të dënuarve në ambientet e ajrimit.
Në materialet hetimore theksohet se nëse kontrollet do të ishin kryer sipas rregullores, ngjarja do të ishte shmangur. Prokuroria konstaton se tre punonjësit shkelën skemën e sigurisë së burgut “Jordan Misja”, duke dështuar të parandalojnë futjen e mjeteve që u përdorën në përpjekjen për arratisje.
Tashmë, çështja është dërguar për gjykim dhe të akuzuarit do të përballen me akuzën e “Shpërdorimit të detyrës” sipas nenit 248 të Kodit Penal, që parashikon dënim me burg për zyrtarët që me veprim ose mosveprim shkaktojnë pasoja në sigurinë e institucioneve shtetërore.
Procesi pritet të zhvillohet në ditët në vijim në Gjykatën e Tiranës, ndërsa Prokuroria ka paralajmëruar se do të kërkojë masa shembullore për shkeljet që vunë në rrezik sigurinë e një prej institucioneve më të rëndësishme penitenciare të vendit.
About the Author
