Pas një rritjeje rekord të numrit të shtetësive të reja, opozita gjermane kërkon rishikim të ligjit të nënshtetësisë dhe kufizimin e dyshtetësisë për ata që konsiderohen kërcënim ndaj vlerave kushtetuese të vendit.
Në Gjermani po ndizet debati mbi të ardhmen e shtetësisë së dyfishtë. Partitë e Unionit CDU dhe CSU kanë bërë thirrje për një reformë të gjerë të ligjit të nënshtetësisë, duke kërkuar që qytetarëve me dy pasaporta, të cilët shkelin ligjin ose përbëjnë rrezik për rendin kushtetues, t’u hiqet shtetësia gjermane.
Deputeti i CSU, Stefan Mayer, deklaroi për gazetën Bild se vendi duhet të pyesë veten nëse mund të përballojë ende shtetësinë e dyfishtë universale. Ai kërkoi që “kriminelët, ekstremistët dhe armiqtë e kushtetutës të mos gëzojnë privilegjin e të qenit gjermanë, nëse kanë një pasaportë tjetër”. Në të njëjtën linjë u shpreh edhe politikania e CDU, Cornell Babendererde, e cila theksoi se shtetësia e dyfishtë duhet të mbetet përjashtim, jo rregull.
Këto thirrje vijnë në një kohë kur numri i personave që marrin shtetësinë gjermane ka arritur nivele historike. Vetëm në vitin 2024, më shumë se 292 mijë persona u natyralizuan, një rritje prej 46% krahasuar me një vit më parë. Sipas të dhënave zyrtare, rreth 80% e tyre ruajtën pasaportën e mëparshme, duke përfituar kështu dyshtetësinë.
Një pjesë e opozitës gjermane e lidh këtë prirje me arsye përfitimi dhe jo me integrimin real. “Nëse shumica e të rinjve që marrin shtetësinë duan të mbajnë edhe pasaportën e vendit të origjinës, duhet të pyesim veten nëse kjo është çështje identiteti apo thjesht përfitimi,” u shpreh Mayer.
Nga ana tjetër, qeveria gjermane dhe Partia Socialdemokrate (SPD) e kancelarit Olaf Scholz e kanë kundërshtuar idenë e kufizimit të dyshtetësisë, duke theksuar se integrimi nxit përfshirjen dhe ndjenjën e përkatësisë. Ndërkohë, ndryshimet e fundit ligjore kanë hequr mundësinë për marrjen e shtetësisë gjermane përmes procedurës së përshpejtuar brenda tre vitesh për personat e integruar mirë.
Debati pritet të ashpërsohet në Bundestag, ndërsa Gjermania përballet me sfidën midis ruajtjes së vlerave kushtetuese dhe realitetit të një shoqërie gjithnjë e më shumë multikulturore.
About the Author
