Një avion i vogël turistik u detyrua të bënte një ulje emergjente në plazhin e Pavillon-Royal, në Bidart të Francës, pasi humbi fuqinë e motorit gjatë afrimit në aeroportin e Biarritz. Piloti doli i padëmtuar.
Një incident i rrallë ajror ka ndodhur këtë të hënë, më 3 nëntor, në jug të Francës. Një avion i vogël turistik, me një person në bord, është detyruar të bëjë një ulje emergjente në plazhin e Pavillon-Royal, në komunën e Bidart, pasi pësoi humbje të fuqisë së motorit në momentin që po afrohej për të zbritur në aeroportin e Biarritz.
Sipas mediave franceze, piloti, një anëtar me përvojë i Aéroclub Dassault-Bréguet, kishte marrë urdhër nga kulla e kontrollit që të qëndronte në ajër për disa minuta, për shkak të trafikut ajror. Gjatë kësaj pritjeje, avioni filloi të humbiste shpejtësinë dhe lartësinë.
Duke parë se rrezikonte të binte mbi një zonë të banuar, piloti vendosi të ndërmerrte një manovër të rrezikshme, por të zgjuar: identifikoi një segment të zbrazët të plazhit dhe e uli avionin në një sipërfaqe të ngushtë rëre, pa shkaktuar dëme apo lëndime.
Sipas dëshmitarëve, ulja u krye me qartësi dhe gjakftohtësi të jashtëzakonshme, ndërsa autoritetet lokale e kanë përgëzuar pilotin për vendimin e tij të shpejtë që shmangu një tragjedi të mundshme.
Avioni nuk pësoi dëmtime serioze, ndërsa policia dhe shërbimet e emergjencës mbërritën menjëherë në vendngjarje për të siguruar zonën.
Sipas hetimeve paraprake, shkaku i incidentit lidhet me një defekt teknik në motor, ndërsa avioni pritet të transportohet për inspektim në aeroportin e Biarritz-it.
Ky episod ka ngjallur interes të madh në Francë, pasi konsiderohet një shembull i rrallë profesionalizmi dhe vetëkontrolli në situata ekstreme ajrore.
About the Author
