Opozita kërkon që projektbuxheti të shqyrtohet vetëm pasi të dorëzohet edhe paketa fiskale
Ka nisur mbledhja e Konferencës së Kryetarëve ku ministri i Financave Petrit Malaj paraqiti projektbuxhetin për vitin 2026, i cili është miratuar në Këshillin e Ministrave dhe tashmë ka kaluar për diskutim në Kuvend. Sipas ministrit, dokumenti është në funksion të forcimit të financave publike, planit të rritjes ekonomike dhe rritjes së standardeve të mirëqenies për qytetarët. Shpenzimet publike të parashikuara arrijnë në 886.7 miliardë lekë dhe synojnë investime në infrastrukturë, energji të gjelbër, sisteme digjitale dhe mbështetje sociale.
Nga ana tjetër, përfaqësuesja e Partisë Demokratike Jorida Tabaku theksoi se nuk mund të diskutohet projektbuxheti pa paketën fiskale, duke qenë se të ardhurat e parashikuara varen pikërisht nga ndryshimet fiskale që ende nuk janë depozituar në Kuvend. Sipas saj, procesi duhet të zhvillohet në të njëjtën kohë për të garantuar transparencë dhe kuptueshmëri të plotë të ndikimit financiar.
Ministri Malaj sqaroi se paketa fiskale është ende në konsultim me grupet e interesit dhe me institucionet ndërkombëtare, si pjesë e procesit të përafrimit me direktivat evropiane. Ai theksoi se ajo do të dorëzohet brenda javës së ardhshme dhe se nuk priten ndryshime të mëdha në përmbajtjen e saj.
Gjatë mbledhjes u sugjerua që debatet për projektbuxhetin të shtyhen për javën e ardhshme në mënyrë që dy dokumentet të vijnë së bashku për shqyrtim. Propozimi u paraqit nga kryetari i Grupit Parlamentar të PD-së, Gazment Bardhi, i cili kërkoi respektimin e procedurave dhe praktikave të ndjekura më parë në Kuvend.
Diskutimet pritet të vijojnë, ndërsa vendimi për kalendarin e shqyrtimit mbetet ende i hapur.
About the Author
