SPAK dhe BKH intensifikojnë hetimet, masa sigurie për zyrtarë dhe biznesmenë të përfshirë në dosjen e tenderave
Një operacion i gjerë i Prokurorisë së Posaçme kundër Korrupsionit dhe Krimit të Organizuar, në bashkëpunim me Byronë Kombëtare të Hetimit, ka zbuluar abuzime të dyshuara me tenderat e Agjencisë Kombëtare të Shoqërisë së Informacionit. Në kuadër të këtij hetimi janë ushtruar dhjetëra kontrolle dhe janë lëshuar gjashtë masa sigurie për persona të dyshuar si të përfshirë në skemën e shkeljeve.
Sipas të dhënave zyrtare, drejtoresha e AKSHI-t, Mirlinda Karçanaj, është vendosur në masën e sigurisë arrest shtëpie, ndërsa për Ergys Agasin dhe biznesmenin Ermal Beqiraj është caktuar masa arrest me burg. Hetimet lidhen me procedura tenderimi që dyshohet se janë manipuluar në kundërshtim me ligjin, duke favorizuar subjekte të caktuara.
Si pasojë e zhvillimeve të fundit, zëvendësdrejtori i krimeve në Policinë e Tiranës, Erion Ismaili, është pezulluar nga detyra. Vendimi është marrë në funksion të hetimit dhe për të garantuar mosndikimin në procesin hetimor që vijon.
SPAK ka bërë të ditur se hetimet po zhvillohen me intensitet për të zbardhur rolin e çdo individi dhe kompanie të përfshirë në këtë dosje, ndërsa nuk përjashtohen masa të tjera penale në vijim. Rasti konsiderohet një nga hetimet më të rëndësishme që lidhen me prokurimet publike dhe përdorimin e fondeve shtetërore.
About the Author
