Vendimi lidhet me pranimin e firmës për kandidaturën e Endri Shabanit për Avokat të Popullit, të cilën vetë Gjekmarkaj e cilëson si gabim
Tensionet e brendshme në Partinë Demokratike vijojnë pa shenja qetësimi, ndërsa Agron Gjekmarkaj ka dorëzuar dorëheqjen nga funksioni i nënkryetarit të kësaj force politike. Dorëheqja i është paraqitur kryetarit të PD-së, Sali Berisha, përmes një letre zyrtare.
Sipas burimeve nga selia blu, Gjekmarkaj ka pranuar se firma e tij për kandidaturën e Endri Shabanit për postin e Avokatit të Popullit ka qenë një vendim i gabuar, duke e konsideruar këtë veprim si shkak kryesor për tërheqjen nga detyra drejtuese në parti.
Në komunikimin e tij me Berishën, Gjekmarkaj ka theksuar se vendimi për pranimin ose jo të dorëheqjes mbetet në kompetencën e kryetarit, ndërsa aktin e tij e ka përshkruar si një reflektim personal dhe një përpjekje për të mbajtur përgjegjësi politike.
Ky zhvillim i ri shton edhe më tej pasiguritë dhe përçarjet brenda Partisë Demokratike, e cila prej kohësh përballet me debate të forta mbi drejtimin, vendimmarrjen dhe funksionimin e strukturave të saj drejtuese.
About the Author
