Avioni privat u rrëzua gjatë një uljeje emergjente pranë Baramatit dhe shpërtheu në flakë, mes viktimave edhe politikani i njohur Ajit Pawar
Pesë persona kanë humbur jetën pas një aksidenti të rëndë ajror në Indinë perëndimore, ku një avion privat u rrëzua gjatë një uljeje emergjente dhe shpërtheu në flakë vetëm rreth 30 metra larg pistës së aeroportit të Baramatit, në distriktin Pune të shtetit Maharashtra.
Mes viktimave konfirmohet edhe Ajit Pawar, 66 vjeç, zëvendëskryeministër i Maharashtrës dhe një nga figurat më të rëndësishme politike në shtet. Bashkë me të humbën jetën dy pilotët e avionit dhe dy pjesëtarë të stafit të sigurisë.
Sipas autoriteteve lokale, të gjithë personat në bord u nxorën pa shenja jete nga rrënojat e përfshira nga flakët. Dëshmitarë okularë kanë deklaruar se avioni dukej i paqëndrueshëm gjatë zbritjes dhe se pas përplasjes në tokë pasuan disa shpërthime të njëpasnjëshme, duke e bërë të pamundur ndërhyrjen për shpëtimin e pasagjerëve.
Avioni tip Learjet 45 ishte nisur nga Mumbai drejt qytetit Baramati, vendlindja e Ajit Pawar, dhe u rrëzua rreth orës 08:45 të mëngjesit. Pamjet nga vendngjarja tregojnë dhjetëra forca emergjence dhe banorë vendas që tentojnë të shuajnë flakët në një fushë të hapur ku përfundoi avioni.
Ajit Pawar ishte pjesë e koalicionit qeverisës në Maharashtra dhe kishte një karrierë të gjatë politike. Kryeministri indian Narendra Modi shprehu ngushëllime për humbjen, duke e cilësuar Pawar si një drejtues me përvojë të thellë administrative dhe me përkushtim për shtresat më të varfra të shoqërisë.
Autoritetet indiane kanë nisur hetimet për të zbardhur shkaqet e aksidentit, ndërsa tragjedia ka tronditur opinionin publik dhe skenën politike në Indi.
About the Author
