Autoritetet kanadeze urdhërojnë largimin e produktit nga tregu në mbarë vendin, qytetarët paralajmërohen të mos e konsumojnë
Autoritetet kanadeze kanë shpallur një alarm ushqimor në shkallë kombëtare, pas tërheqjes nga tregu të hamburgerëve të mishit të markës No Name, për shkak të rrezikut të mundshëm të ndotjes me bakterin E. coli.
Njoftimi u bë nga Canadian Food Inspection Agency, pas analizave laboratorike të kryera mbi produktet që tashmë ishin shpërndarë në të gjithë Kanadanë nga kompania Loblaws Inc, e cila zotëron edhe markën No Name. Hetimet për sigurinë ushqimore vijojnë dhe nuk përjashtohet mundësia që edhe produkte të tjera të përfshihen në tërheqje.
Sipas autoriteteve, deri në këto momente nuk janë raportuar raste sëmundjesh si pasojë e konsumimit të këtij produkti, por masat po merren në mënyrë parandaluese për të shmangur çdo rrezik për shëndetin publik.
Produkti i tërhequr është hamburger viçi në paketim 1.36 kilogramë, me datë skadence 5 maj 2026 dhe kod UPC 0 60383 37333 7. Inspektorët ushqimorë u bëjnë thirrje qytetarëve që, nëse e kanë blerë këtë produkt, ta hedhin menjëherë dhe të mos e konsumojnë, edhe nëse nuk vërehet asnjë ndryshim në shije apo aromë.
Bakteri E. coli mund të shkaktojë shqetësime serioze shëndetësore, përfshirë të përziera, të vjella, dhimbje barku dhe diarre, ndërsa në raste të rënda mund të çojë në komplikacione serioze dhe nevojë për trajtim spitalor.
Autoritetet kanadeze theksojnë se siguria ushqimore mbetet prioritet dhe se kontrollet do të vijojnë deri në sqarimin e plotë të rastit. Qytetarët këshillohen të ndjekin njoftimet zyrtare dhe të raportojnë çdo shqetësim të dyshimtë shëndetësor pranë institucioneve përkatëse.
About the Author
