E zgjodhen kryetare bashkie si shtetase filipinase, por gjykata e shpalli kineze dhe organizatore të një qendre gjigante mashtrimesh online
Një gjykatë në Filipine ka dënuar me burgim të përjetshëm Alice Guo, 35 vjeçe, një shtetase kineze që u ngjit në politikë duke u paraqitur si filipinase dhe u zgjodh kryetare e Bashkisë Bamban, në provincën Tarlac. Sipas prokurorisë, Guo ka qenë në qendër të një rrjeti të madh trafikimi njerëzish, ku qindra shtetas të huaj janë detyruar të punojnë në qendra bastesh dhe mashtrimesh online.
Së bashku me të, gjykata në Manila dënoi me burgim të përjetshëm edhe shtatë persona të tjerë të përfshirë në të njëjtën skemë. Prokurorja e shtetit Olivia Torrevillas deklaroi pas seancës se brenda pak më shumë se një viti nga nisja e procedurave, gjykata ka dhënë një vendim të plotë fajësie për Guo dhe bashkëpunëtorët e saj.
Rasti shpërtheu në mars 2024, kur policia bastisi një kompleks të madh të lidhur me Guo, ku ndodheshin godina zyrash, vila luksoze dhe një pishinë e madhe. Operacioni u nis pasi një punëtor vietnamez arriti të arratisej dhe të njoftonte autoritetet. Në vendngjarje u gjetën mbi 700 persona nga Filipinet, Kina, Vietnami, Malajzia, Tajvani, Indonezia dhe Ruanda, të cilët dyshohet se detyroheshin të kryenin mashtrime financiare online nën kërcënimin e dhunës dhe torturës.
Dokumentet e sekuestruara në kompleks e identifikonin Alice Guo si presidente të kompanisë pronare të qendrës së paligjshme të kumarit dhe mashtrimeve. Guo u arratis nga Filipinet, por u arrestua në shtator 2024 në Indonezi dhe më pas u ekstradua për t’u përballur me drejtësinë në Manila.
Autoritetet filipinase theksuan se brenda kompleksit janë dokumentuar si organizim trafikimi njerëzish, ashtu edhe akte individuale trafikimi, ndaj një pjesë e të pandehurve u dënuan si organizatorë të skemës, ndërsa të tjerët për rolin e tyre në rekrutimin dhe shfrytëzimin e viktimave.
Përveç akuzave për trafikim njerëzish, çështja ka hapur një debat të gjerë në Filipine për sigurinë kombëtare dhe ndërhyrjen e ndikimeve të huaja në politikën vendase. Një gjykatë në Manila vendosi më herët se Guo, si shtetase kineze, nuk ka qenë asnjëherë e ligjshme për të kandiduar në zgjedhjet lokale, duke shpallur të pavlefshëm edhe mandatin e saj si kryebashkiake e Bamban.
Gjatë hetimeve parlamentare, disa politikanë ngritën dyshime se ajo mund të ketë vepruar si aset i interesave kineze, duke shmangur regjistrat civilë, ligjet e imigracionit dhe rregullat e zgjedhjeve në Filipine. Ambasada kineze në Manila nuk ka dhënë ende asnjë reagim publik lidhur me vendimin e gjykatës.
Rasti i Alice Guo konsiderohet një prej goditjeve më të forta ndaj rrjeteve rajonale të trafikimit të njerëzve dhe qendrave të kumarit online në Azinë Juglindore, ndërsa autoritetet filipinase paralajmërojnë operacione të tjera kundër skemave të ngjashme në territorin e tyre.
About the Author
