Midis viteve 2020 dhe 2024, kryebashkiakja e Parisit, Anne Hidalgo, ka shpenzuar 84.200 euro për veshje tek Burberry, Dior apo Gérard Darel, në kuadër të shpenzimeve të përfaqësimit.
Që në ardhjen e saj në Hôtel de Ville në vitin 2014, Anne Hidalgo e vendosi deontologjinë dhe transparencën në qendër të mandatit, me miratimin e një kodi sjelljeje, të bazuar mbi interesin publik, ndershmërinë, paanshmërinë, pavarësinë dhe shembullin si dhe krijimin e një komisioni etike, i pari i këtij lloji në një bashki franceze.
Por në praktikë, kryebashkiakja shpesh ka refuzuar të bëjë publike faturat e shpenzimeve të saj.
Në vitin 2017, gazetari holandez Stefan de Vries priti pesë vjet procedurë gjyqësore për të marrë faturat për vitin e mbajtjes së Lojërave Olimpike. Në vitin 2021, tre shoqata morën pjesërisht dokumentet e vitit 2020, vetëm pas ndërhyrjes së drejtësisë. Në mars 2024, shoqata Transparence Citoyenne u detyrua sërish t’i drejtohej gjykatës administrative për të siguruar dokumentet që lidhen me shpenzimet e udhëtimeve, restoranteve dhe përfaqësimit.
84.200 euro shpenzime për përfaqësim
Midis viteve 2020 dhe 2024, Anne Hidalgo kishte çdo vit rreth 20.000 euro për shpenzime përfaqësimi. Këto u përdorën kryesisht për blerje veshjesh, duke lënë shpesh teprica të vogla: 2.800 euro në 2020, 14 euro në 2021, 5.800 euro në 2022, 4.900 euro në 2023 dhe 714 euro në 2024.
Dyqanet e shpeshta ishin BHV Marais, Repetto, Apostrophe, Éric Bompard dhe Gérard Darel. Ndër blerjet më të kushtueshme përmenden: dy fustane Dior në 2024 për 6.320 euro; një pallto Burberry në 2023 për 3.067,50 euro; një bluzë Dior në 2021 për 1.120 euro; një xhaketë Burberry në 2020 për 1.087 euro.
Edhe në 2017, blerje të tjera kishin ngjallur kritika: tre fustane Dior për 1.188, 1.840 dhe 1.440 euro; një fustan Courrèges për 720 euro; dy fustane Diane von Furstenberg me aksesore përkatësisht 1.660 dhe 895 euro.
Bashkia i mbron këto shpenzime si të nevojshme për përfaqësimin e Francës jashtë vendit dhe nënvizon ripërdorimin e veshjeve. Shoqata Transparence Citoyenne kundërshton interpretimin juridik, duke kujtuar se shpenzimet për veshje nuk duhet të përfshihen te shpenzimet e përfaqësimit, përveç ceremonive që kërkojnë një veshje specifike.
Midis korrikut 2020 dhe dhjetorit 2023, udhëtimet e kryebashkiakes jashtë Parisit kushtuan rreth 125 mijë euro, duke përfshirë transportin dhe akomodimin. Udhëtimet më të kushtueshme ishin Nju Jorku në 2022 dhe 2023 për samite dhe takime zyrtare (10.034 dhe 9.810 euro); Tokio në 2021 për Lojërat Paraolimpike (12.687 euro); dhe Tahiti në tetor 2023 për të vizituar vendin olimpik në Teahupoo.
Shpenzimet e udhëtimeve të nënkryetarëve të bashkisë midis 2020 dhe 2024 vlerësohen afërsisht në 400.000 euro.
Qëndrimi në Tahiti kushtoi rreth 60.000 euro dhe përfshiu dy të zgjedhur dhe tre bashkëpunëtorë. Kryebashkiakja nuk kishte komunikuar për këtë udhëtim dhe u kishte kërkuar ekipeve të saj të publikonin video që linin të kuptohej se ajo ndodhej në Paris. Ajo nuk mori pjesë në takimin kryesor në vendin e garës olimpike dhe tejkalimi i tarifës telefonike (roaming), i vlerësuar në 30 mijë euro, nuk u deklarua.
Anne Hidalgo qëndroi dy javë për të vizituar të bijën dhe deklaroi se e kishte paguar vetë biletën e kthimit, por asnjë justifikim nuk është dorëzuar. Transparence Citoyenne ankohet se dokumentet janë të pjesshme, pa detaje për shpenzimet e restoranteve, akomodimit apo biletës së kthimit. Kabineti i kryebashkiakes thotë se ka dorëzuar të gjitha justifikimet, por shoqatat e kontestojnë këtë version.
Në mars 2024, shoqata AC!! anti-korrupsion paraqiti padi për përfitim të paligjshëm interesash dhe shpërdorim të fondeve publike, duke çuar në një kontroll të Prokurorisë Kombëtare Financiare (PNF) në Hôtel de Ville. Sipas PNF-së, hetimi është ende në vijim.
About the Author
