Princ Mohammed bin Salman pritet të udhëtojë në Uashington për takime me presidentin Donald Tramp, ndërsa në prapaskenë përgatitet një samit ekonomik me peshë mes të dy vendeve.
Arabia Saudite pritet të organizojë një samit të rëndësishëm investimesh në Uashington më 19 nëntor, në të njëjtën kohë me vizitën zyrtare të Princit të Kurorës Mohammed bin Salman në Shtëpinë e Bardhë. Ngjarja, e cila ende nuk është bërë publike, do të zhvillohet në margjina të vizitës dhe nuk figuron në programin zyrtar të princit.
Sipas një burimi të afërt me organizimin, princi saudit do të jetë në Uashington më 18 nëntor për t’u takuar me presidentin Donald Tramp, ndërsa samiti i investimeve do të mbahet një ditë më pas. Megjithëse pjesëmarrja e Princit bin Salman dhe e Tramp në samit nuk është e konfirmuar, burimi nuk e përjashton mundësinë që të dy liderët të shfaqen për një përshëndetje të shkurtër.
Lajmi u raportua fillimisht nga CBS News, e cila përmendi se samiti do të zhvillohet në Qendrën John F. Kennedy për Artet e Performuara dhe do të bashkë-organizohet nga Ministria e Investimeve e Arabisë Saudite dhe Këshilli i Biznesit SHBA–Arabia Saudite.
Vizita e Princit bin Salman vjen në një moment të rëndësishëm diplomatik. Presidenti Trump ka shtuar përpjekjet për ta bindur Arabinë Saudite t’i bashkohet Marrëveshjeve të Abrahamit, që normalizojnë marrëdhëniet mes Izraelit dhe vendeve me shumicë myslimane. Riad konsiderohet vend kyç në këto nisma dhe çdo hap përpara do të kishte ndikim të madh gjeopolitik në Lindjen e Mesme.
Arabia Saudite mbetet ndër blerësit më të mëdhenj të armëve amerikane, dhe gjatë takimit të 18 nëntorit pritet të diskutohet edhe një marrëveshje e mundshme e mbrojtjes mes dy vendeve. Sipas Financial Times, ekziston optimizëm se një marrëveshje e tillë mund të nënshkruhet gjatë vizitës së princit.
Samiti i 19 nëntorit pritet të mbledhë kompani amerikane dhe saudite, investitorë dhe zyrtarë të lartë ekonomikë, duke synuar nxitjen e projekteve të përbashkëta dhe shtrirjen e bashkëpunimit ekonomik mes dy ekonomive më të rëndësishme në botë.
About the Author
