Presidenti amerikan njofton ndalimin njëjavor të bombardimeve ruse mbi zonat urbane, ndërsa miliona civilë ukrainas përballen me temperatura nën zero dhe mungesë energjie
Presidenti rus Vladimir Putin ka pranuar një armëpushim të përkohshëm për bombardimet mbi qytetet e Ukrainës, pas një kërkese të drejtpërdrejtë nga presidenti amerikan Donald Tramp. Lajmi u bë i ditur nga vetë Tramp, i cili deklaroi se Moska ka rënë dakord të ndalë sulmet ajrore për një javë, në një moment kritik kur vendi po përballet me të ftohtë ekstrem dhe krizë humanitare.
Sipas Tramp, kërkesa iu bë Putinit për shkak të temperaturave jashtëzakonisht të ulëta që kanë goditur Ukrainën, duke lënë miliona civilë pa energji elektrike dhe ngrohje, si pasojë e sulmeve të vazhdueshme ruse ndaj infrastrukturës energjetike. Ai tha se kishte kërkuar personalisht që për një javë të mos goditeshin Kievi dhe qytete të tjera, kërkesë që sipas tij u pranua.
Ndërkohë, raportohet se edhe forcat ukrainase janë udhëzuar të shmangin goditjet ndaj sistemeve energjetike ruse gjatë kësaj periudhe. Presidenti ukrainas Volodymyr Zelensky konfirmoi se çështja e mosgoditjes së infrastrukturës energjetike ishte diskutuar në bisedimet e fundit në Emiratet e Bashkuara Arabe dhe shprehu pritshmërinë që marrëveshja të zbatohet në praktikë.
Armëpushimi i përkohshëm vjen pas një serie sulmesh intensive ruse me dronë dhe raketa, të cilat kanë dëmtuar rëndë rrjetin energjetik të Ukrainës. Vetëm gjatë janarit, sulmet në Kiev lanë rreth një milion persona pa energji elektrike dhe mijëra pallate pa ngrohje, ndërsa qindra mijëra familje vijojnë ende të përballen me mungesë energjie.
Autoritetet ukrainase paralajmërojnë se situata mbetet e brishtë, pasi inteligjenca ka sinjale se Rusia po përgatit sulme të reja ajrore në shkallë të gjerë. Temperaturat në veri dhe lindje të vendit pritet të zbresin nën -20 gradë Celsius, duke e bërë edhe më kritike gjendjen e popullsisë civile.
Nga ana tjetër, Tramp deklaroi se ka përparim në bisedimet e ndërmjetësuara nga SHBA mes Kievit dhe Moskës për t’i dhënë fund luftës, e cila po hyn në vitin e saj të pestë. Ministri i Jashtëm ukrainas ka bërë të ditur se Zelensky është i gatshëm të takohet ballë për ballë me Putinin për bisedime direkte, ndërsa negociatat trepalëshe me ndërmjetësim amerikan pritet të vijojnë në Abu Dhabi.
Megjithatë, pikat kyçe të konfliktit mbeten të hapura, përfshirë kontrollin e rajonit të Donbasit dhe centralin bërthamor të Zaporizhzhias, çka e bën armëpushimin aktual një hap të kufizuar, por jetik për mbijetesën e civilëve ukrainas në mes të dimrit të ashpër.
About the Author
