Policia e Kamzës ka vënë në pranga një të ri që lëvizte i veshur si efektiv i rendit. Gjatë kontrollit në banesën e tij u zbuluan armë, dokumente të falsifikuara dhe pajisje që imitonin ato të Policisë së Shtetit.
Një 20-vjeçar nga Kamza ka rënë në prangat e policisë pasi u kap duke u shtirur si punonjës i rendit publik. I riu, identiteti i të cilit nuk është bërë ende publik, u ndalua teksa lëvizte me automjetin e tij tip “Mercedes-Benz”, i veshur me uniformë dhe stema identike me ato të Policisë së Shtetit.
Pas ndalimit dhe verifikimeve, efektivët zbuluan se ai nuk kishte asnjë lidhje me strukturat e policisë. Kontrollet e mëvonshme në banesën e tij nxorën në dritë një sërë materialesh të dyshuara si të falsifikuara, mes tyre katër dokumente identifikimi me foto dhe të dhëna të ndryshme, një armë sportive të llojit pistoletë me dy krehra, një uniformë policie, gjashtëmbëdhjetë stema e grada, si dhe tre kapele me simbole të ngjashme me ato zyrtare.
Policia tha se hetimet vijojnë për të zbuluar nëse i riu mund të ketë qenë i përfshirë në aktivitete të tjera të paligjshme, duke përdorur pajisjet dhe uniformat për përfitime personale.
Në përfundim të veprimeve hetimore, 20-vjeçari u arrestua në flagrancë, ndërsa materialet iu referuan prokurorisë për veprime të mëtejshme. Autoritetet e cilësuan rastin si një tjetër shembull të rrezikut që paraqesin personat që keqpërdorin simbolet dhe uniformat e Policisë së Shtetit për qëllime mashtruese.
About the Author
