Gazetari investigativ thotë se materiale komprometuese, të ngjashme me dosjet Epstein, janë sekuestruar dhe ruhen nga Prokuroria e Posaçme për të shmangur tronditje politike dhe rreziqe për sigurinë kombëtare
Gazetari investigativ Artan Hoxha ka deklaruar se edhe në Shqipëri ekzistojnë skandale të rënda komprometuese, të krahasueshme me ato që prej vitesh kanë tronditur Shtetet e Bashkuara përmes çështjes Epstein. Sipas tij, materiale filmike dhe fotografike shantazhuese që përfshijnë figura të rëndësishme politike dhe shtetërore janë sekuestruar dhe ndodhen në administrim të SPAK.
Gjatë një interviste në emisionin Çim Peka LIVE në SYRI TV, Hoxha u shpreh se këto materiale nuk mund të bëhen publike, pasi publikimi i tyre do të shkaktonte tronditje të forta politike dhe do të hapte një krizë me pasoja që shkojnë përtej debatit publik, duke prekur edhe sigurinë kombëtare. Ai theksoi se dosje të tilla mbahen të mbyllura dhe ruhen me kujdes nga organet e drejtësisë.
Sipas gazetarit, Shqipëria nuk është përjashtim nga skemat e shantazhit përmes videove komprometuese. Ai pretendoi se për vite me radhë individë të caktuar kanë vepruar duke kuruar veset e politikanëve dhe zyrtarëve të lartë, duke i joshur, fotografuar dhe filmuar me qëllim që këto materiale të përdoren si instrument presioni dhe kontrolli.
Hoxha shkoi edhe më tej, duke deklaruar se në disa raste kompromise të tilla janë kthyer në një kusht të pashkruar për avancimin në hierarkinë shtetërore. Sipas tij, persona që synonin karrierë politike ose poste të rëndësishme janë detyruar të bien në gracka komprometuese, për t’u mbajtur më pas nën shantazh.
Gazetari pranoi se, megjithëse këto praktika janë të njohura dhe të diskutuara prej kohësh në rrethe të caktuara, mungesa e provave publike ka bërë që ato të mbeten në nivelin e dyshimeve. Megjithatë, ai këmbënguli se provat ekzistojnë dhe se ato ndodhen tashmë në duart e drejtësisë.
Deklaratat e Artan Hoxhës rikthejnë në vëmendje debatin mbi përdorimin e materialeve komprometuese si mjet kontrolli politik në Shqipëri dhe rolin e SPAK në administrimin e dosjeve që, nëse do të bëheshin publike, mund të ndryshonin rrënjësisht panoramën politike dhe institucionale të vendit.
About the Author
