Viktima e dytë e sulmit mafioz ndërron jetë në Spitalin e Traumës, ndërsa grupet hetimore po rindërtojnë motivet dhe ekzekutimin e atentatit.
Pesë ditë pas atentatit të armatosur që tronditi zonën pranë rrethrrotullimit të Rinasit, Muçi Shaljani ka ndërruar jetë si pasojë e plagëve të rënda që kishte marrë. Ai ishte shtruar në Spitalin e Traumës në gjendje kritike, ku mjekët gjatë gjithë kësaj kohe kishin bërë përpjekje për ta mbajtur në jetë.
Ngjarja ndodhi në mesditën e 11 nëntorit, kur një automjet i blinduar u qëllua me breshëri plumbash nga persona ende të paidentifikuar. Në vendngjarje humbi jetën Gilmando Dani, i njohur për lidhjet e tij me figura të botës së krimit dhe që pak orë më parë ishte kthyer nga Spanja. Dani dhe Shaljani udhëtonin së bashku në momentin e sulmit.
Policia njoftoi se gjatë natës Shaljani nuk arriti të mbijetojë, duke u bërë viktima e dytë e atentatit. Hetimet po vijojnë për identifikimin e autorëve dhe zbardhjen e plotë të dinamikës, ndërsa pista kryesore mbetet ajo e një goditjeje të mirëorganizuar që lidhet me përplasjet mes grupeve kriminale.
Ngjarja ka hapur sërish debatin mbi sigurinë dhe aktivitetin e grupeve të armatosura në zonat pranë aeroportit dhe korridoreve strategjike të vendit.
About the Author
