Kreu i PD ngre dyshime për qëndrimin e zëvendëskryeministres në Kryeministri gjatë natës, një ditë para mbledhjes së Këshillit të Mandateve dhe Imunitetit
Kryetari i Partisë Demokratike, Sali Berisha, ka ngritur mbrëmjen e kaluar akuza të forta ndaj zëvendëskryeministres Belinda Balluku, duke hedhur dyshime serioze për prishje të provave, vetëm një ditë përpara mbledhjes së Këshillit për Rregulloren, Mandatet dhe Imunitetin.
Sipas Berishës, Balluku është filmuar duke dalë nga ambientet e Kryeministrisë rreth orës 22:36, në një kohë kur ndaj saj po zhvillohet një hetim penal nga Prokuroria e Posaçme. Kreu i opozitës e cilëson këtë situatë si tejet shqetësuese, duke ngritur dyshime se zëvendëskryeministrja vazhdon të ketë akses në zyra dhe dokumente shtetërore, pavarësisht statusit të saj në procesin hetimor.
Në reagimin e tij publik, Berisha ka deklaruar se prania e Ballukut në zyrë deri në orët e vona përbën krim në vazhdim dhe rrezikon seriozisht integritetin e hetimit, duke lënë të kuptohet se mund të ketë ndërhyrje në prova apo dokumentacion.
Dosja në fjalë po hetohet nga SPAK, ndërsa ditën e sotme pritet që çështja të diskutohet në Këshillin e Mandateve dhe Imunitetit, ku do të shqyrtohet kërkesa për heqjen e imunitetit të zëvendëskryeministres Belinda Balluku. Situata ka shtuar tensionet politike në Kuvend, në prag të një vendimmarrjeje të rëndësishme parlamentare.
About the Author
