Artisti i njohur i humorit dhe aktivisti i kauzave qytetare do të përfaqësojë opozitën në zgjedhjet e parakohshme për kryeqytetin.
Partia Demokratike ka zyrtarizuar sot kandidatin e saj për zgjedhjet e parakohshme në Bashkinë e Tiranës: aktorin dhe aktivistin Florjan Binaj.
Lajmi u bë publik nga kryetari i PD-së, Sali Berisha, në një deklaratë për mediat nga selia blu.
Berisha tha se Binaj përfaqëson frymën e qytetarit të lirë dhe të angazhuar, duke e cilësuar atë si një artist që ka mbrojtur me guxim kauzat e qytetarëve shqiptarë.
Sipas tij, kandidatura e Binajt u përzgjodh mes disa emrave të propozuar nga drejtues, figura të pavarura dhe përfaqësues të diasporës, si një alternativë që sjell energji të re dhe ndershmëri në përballjen me pushtetin aktual vendor.
“Florjan Binaj është personalitet i shquar i artit dhe komunikimit publik, një zë i lirë që ka mbrojtur qytetarët dhe vlerat demokratike,” – shtoi Berisha, duke theksuar se PD do t’ia propozojë aleatëve këtë emër për mbështetje të përbashkët.
Zgjedhjet e parakohshme në Bashkinë e Tiranës pritet të zhvillohen në fund të vjeshtës, ndërsa kandidatura e Binajt sinjalizon një përpjekje të re të opozitës për të afruar figura të njohura nga jeta publike në garën politike.
About the Author
