Ish-kryeministri Sali Berisha ka bërë një deklaratë të bujshme në rrjetet sociale, duke pretenduar se kryetari i PSD-së, Tom Doshi, është arratisur jashtë vendit pas një urdhri-arresti të lëshuar nga SPAK.
Përmes një postimi në rrjetin e tij social, Sali Berisha ka njoftuar se sipas burimeve të tij, deputeti dhe kryetari i Partisë Socialdemokrate, Tom Doshi, është larguar nga Shqipëria. Ish-kryeministri ka komentuar lajmet e përhapura në Tiranë një natë më parë, sipas të cilave ndaj Doshit ishte prerë një urdhër-arrest nga Prokuroria e Posaçme.
Berisha shkruan se në orët e mbrëmjes në kryeqytet u përfol se Doshi do të paraqitej në SPAK në mëngjesin e sotëm, por mëngjesi e gjeti Tiranën pa asnjë konfirmim zyrtar. Ai shton se së bashku me zërat për arrestimin, është zhdukur edhe vetë Doshi, duke lënë të kuptohet se ky i fundit është larguar drejt një destinacioni të panjohur.
Sipas Berishës, largimi i kreut të PSD-së vjen pas një urdhri të brendshëm për t’u shmangur nga hetimi. Ai e cilëson situatën si një shembull të asaj që e quan “drejtësia e partisë së krimit”, duke ironizuar institucionet që, sipas tij, veprojnë me dy standarde ndaj figurave politike të afërta me mazhorancën.
Nga ana tjetër, as SPAK dhe as vetë Tom Doshi nuk kanë reaguar ende publikisht mbi pretendimet e ish-kryeministrit. Deri në këtë moment, nuk ka asnjë konfirmim zyrtar për ekzistencën e një urdhër-arresti ndaj kreut të PSD-së.
Kujtojmë se Tom Doshi është një ndër figurat më kontradiktore të skenës politike shqiptare, i përfshirë më parë në disa hetime të bujshme dhe shpesh i përfolur për lidhje me çështje të ndjeshme politike dhe ekonomike. Deklarata e Berishës pritet të shkaktojë reagime në orët në vijim.
About the Author
