Temperaturat ekstreme, akulli dhe bora kanë shkaktuar dhjetëra vdekje në disa shtete amerikane, ndërsa autoritetet hetojnë shkaqet dhe komunitetet janë në zi
Bilanci i viktimave nga stuhia e fuqishme dimërore që goditi Shtetet e Bashkuara nga 23 deri më 26 janar ka shkuar në të paktën 62 persona, ndërsa hetimet vijojnë për të përcaktuar rrethanat e sakta të çdo rasti. Autoritetet paralajmërojnë se numri mund të rritet, teksa një tjetër valë e motit ekstrem pritet në ditët në vijim.
Një nga ngjarjet më të rënda u regjistrua në veri-lindje të Teksasit, në Qarkun Fannin, ku tre vëllezër të mitur, 6, 8 dhe 9 vjeç, humbën jetën pasi ranë në një pellg të ngrirë. Sipas autoriteteve lokale, fëmijët po luanin jashtë kur më i vogli theu akullin dhe vëllezërit e tij u përpoqën ta shpëtonin, duke përfunduar edhe ata në ujërat e ftohta. Komuniteti lokal është tronditur nga humbja e trefishtë.
Viktima janë regjistruar edhe nga aksidente rrugore në rrugë të mbuluara nga akulli, nga aksidente gjatë lojërave me slitë, si dhe nga emergjenca shëndetësore të lidhura me përpjekjet për pastrimin e borës. Autoritetet raportojnë se të paktën tetë persona kanë humbur jetën gjatë ose pas pastrimit të borës, kryesisht nga probleme kardiake, një rrezik që është paralajmëruar edhe nga Shoqata Amerikane e Zemrës.
Raste vdekjesh janë shënuar edhe si pasojë e hipotermisë, veçanërisht tek të moshuarit, si dhe nga zjarre banesash, fenomen që priret të shtohet gjatë periudhave të ftohta për shkak të përdorimit të pajisjeve ngrohëse.
Shteti i Nju Jorkut kryeson listën me numrin më të lartë të viktimave, i ndjekur nga Indiana, Teksasi, Tenesi dhe Luiziana. Spitalet në disa zona kanë raportuar fluks të shtuar pacientësh me infarkte dhe komplikacione serioze shëndetësore të shkaktuara nga ekspozimi ndaj të ftohtit ekstrem.
Autoritetet u bëjnë thirrje qytetarëve të tregojnë kujdes maksimal, të shmangin aktivitetet e rrezikshme në kushte akulli dhe të ndihmojnë personat më vulnerabël, ndërsa hetimet vazhdojnë për të zbardhur plotësisht shkaqet e kësaj tragjedie kombëtare.
About the Author
