Deputeti demokrat akuzon ministrin Niko Peleshi për manipulim të ngjarjes me qëllim dëmtimin e imazhit të tij në prag të procesit zgjedhor
Deputeti i Partisë Demokratike, Bledion Nallbati, është paraqitur sot në Prokurorinë e Posaçme (SPAK), ku u mor në pyetje lidhur me përfshirjen e tij në një përplasje të ndodhur me një shofer kamioni. Pas daljes nga seanca, Nallbati dha një deklaratë për mediat, duke e cilësuar ngjarjen si një konflikt banal dhe të stisur.
Sipas deputetit demokrat, incidenti është përdorur në mënyrë të qëllimshme për ta dëmtuar politikisht. “U paraqita në cilësinë e personit në dijeni të ngjarjes. Ky ishte një konflikt i inskenuar, i manipuluar nga Niko Peleshi dhe njerëzit e tij për të ndikuar në procesin zgjedhor,” deklaroi Nallbati.
Ai shtoi se përplasja ka pasur natyrë krejtësisht të sajuar dhe se po përdoret nga kundërshtarët politikë për të devijuar vëmendjen nga çështjet reale të qeverisjes. “Në vend që të merren me problemet e qytetarëve, ata fabrikojnë ngjarje për të baltosur opozitën,” theksoi deputeti.
SPAK deri më tani nuk ka dhënë detaje mbi ecurinë e hetimeve, ndërsa pritet që të thirren edhe persona të tjerë që mund të kenë dijeni për incidentin. Ngjarja po trajtohet në kuadër të verifikimeve për rrethana të mundshme politike të konfliktit.
About the Author
