Ish-deputetja socialiste emërohet në krye të Autoritetit Kombëtar të Ushqimit, ndërsa qeveria flet për standarde të BE-së dhe masa më të rrepta sigurie
Blerina Gjylameti është emëruar drejtoreshë e re e Autoriteti Kombëtar i Ushqimit. Emërimi i saj vjen pas një periudhe me ndryshime të shpeshta në krye të institucionit dhe rikthen në drejtimin e AKU-së një figurë politike.
Gjylameti, ish-deputete e Partisë Socialiste, nuk arriti të rikthehej në Kuvend në zgjedhjet e fundit, duke mbetur jashtë parlamentit për vetëm 20 vota diferencë me Olta Xhaçka. Tashmë ajo do të mbajë përgjegjësinë për kontrollin, cilësinë dhe sigurinë e ushqimeve që konsumohen në tregun shqiptar.
Emërimi i ri shoqërohet me paralajmërime për një qasje më të ashpër ndaj standardeve ushqimore. Kryeministri Edi Rama ka deklaruar se Shqipëria duhet të funksionojë sipas të njëjtave kritere sigurie si vendet e Bashkimit Europian, duke theksuar se ushqimet që nuk përmbushin standardet mund të bllokohen nga tregu.
Sipas Ramës, në skenarin më ekstrem, vendi mund të përballet edhe me nevojën për të importuar gjithçka që konsumon, një situatë që kërkon, siç u shpreh ai, super punë dhe super vendosmëri nga institucionet përgjegjëse, pa toleruar shkelje në emër të vazhdimit të aktivitetit.
Kryeministri e lidhi forcimin e kontrolleve ushqimore drejtpërdrejt me procesin e integrimit europian, duke nënvizuar se Shqipëria ka përpara vite intensive pune për t’u përgatitur për tryezën e BE-së dhe fazën e negociatave.
About the Author
