I dyshuari përballet me akuza të rënda për shfrytëzim seksual të fëmijëve dhe pjesëmarrje në grup kriminal të organizuar
Një shtetas britanik 36-vjeçar është akuzuar se ka mbikëqyrur shpërndarjen e dhjetëra mijëra imazheve të abuzimit seksual të fëmijëve, ndërsa vepronte si moderator në disa faqe pedofilie në dark web, u bë e ditur në një seancë gjyqësore në Londër.
I akuzuari, Matthew Slate, u paraqit në Highbury Corner Magistrates’ Court, ku ndaj tij janë ngritur akuza për organizimin dhe lehtësimin e shfrytëzimit seksual të fëmijëve nën moshën 13 vjeç në disa platforma të paligjshme online.
Sipas prokurorisë, faqet në fjalë kishin si qëllim të vetëm shpërndarjen e materialeve të paligjshme që lidhen me abuzimin seksual të të miturve. Slate dyshohet se vepronte si moderator global në një prej këtyre faqeve, duke përdorur një pseudonim në rrjetin e errët.
Ai përballet gjithashtu me akuza për shpërndarje, prodhim dhe posedim të materialeve të ndaluara që përfshijnë të mitur, si dhe për përfshirje në veprimtarinë e një grupi kriminal të organizuar. Autoritetet pretendojnë se ai ka lehtësuar shpërndarjen e mbi 2 mijë imazheve dhe videove të tilla dhe se ka pasur në posedim rreth 57 mijë materiale të paligjshme, një pjesë e konsiderueshme e tyre të kategorizuara si shumë të rënda.
Veprat penale dyshohet se janë kryer në periudhën korrik 2023 deri në shkurt 2025. Gjatë seancës, Slate foli vetëm për të konfirmuar identitetin dhe adresën e tij.
Gjykata vendosi lirimin e tij me kusht, duke i ndaluar kontaktin e pambikëqyrur me persona nën 18 vjeç, përdorimin e aplikacioneve të koduara, fshirjen e të dhënave digjitale apo përdorimin e rrjeteve VPN. Ai gjithashtu duhet të dorëzojë pajisjet elektronike autoriteteve sa herë që kërkohet.
Seanca për pranimin e fajësisë dhe përgatitjen e gjykimit është caktuar të mbahet më 19 shkurt në Wood Green Crown Court.
About the Author
