Kapiteni i Portugalisë nuk pritet të aktivizohet ndaj Al Riyadh, i pakënaqur me mungesën e përforcimeve dhe vendimet e fundit të klubit saudit
Cristiano Ronaldo nuk pritet të jetë pjesë e ndeshjes së radhës së Al-Nassr ndaj Al Riyadh, e planifikuar për të hënën, pasi është i pakënaqur me situatën aktuale te klubi saudit. Sipas raportimeve, ylli portugez ka vendosur të mos luajë si shenjë pakënaqësie ndaj mungesës së lëvizjeve në merkato.
Burime pranë mediave portugeze, përfshirë A Bola, bëjnë të ditur se Ronaldo është i zhgënjyer me strategjinë e Fondit të Investimeve Publike të Arabisë Saudite, i cili mbikëqyr klubin, sidomos kur krahasohet me rivalët direktë si Al-Hilal, që janë pranë afrimit të Karim Benzema.
40-vjeçari, i cili iu bashkua Al-Nassr në dhjetor të vitit 2022 pas aventurës së tij të dytë te Manchester United, është figura kryesore e kampionatit saudit dhe pritej të ishte lideri i projektit afatgjatë të klubit. Megjithatë, zhvillimet e fundit duket se kanë sjellë një përplasje të hapur mes tij dhe drejtuesve.
Një tjetër pikë përplasjeje lidhet me ndryshimet në strukturën drejtuese të klubit. Kompetencat e drejtorit sportiv dhe të drejtuesve ekzekutivë janë reduktuar pas një mbledhjeje të bordit muajin e kaluar, çka ka shtuar pakënaqësinë e Ronaldos ndaj mënyrës se si po menaxhohet Al-Nassr.
Situata mbetet e tensionuar dhe pritet të shihet nëse refuzimi i aktivizimit ndaj Al Riyadh do të shërbejë si sinjal presioni për drejtuesit apo si nisje e një krize më të thellë mes yllit portugez dhe klubit saudit.
About the Author
