Socialistët mbrojnë procedurat, opozita akuzon për shkelje të Kushtetutës dhe mbytje të parlamentarizmit
Konferenca e Kryetarëve u zhvillua mes tensioneve këtë të martë, pasi Partia Socialiste refuzoi kërkesën e opozitës për një mocion me debat mbi programin qeverisës të kryeministrit Edi Rama.
Kreu i grupit parlamentar të PS-së, Taulant Balla, argumentoi se mocioni i propozuar nuk përputhet me rregulloren, pasi përfshin gjashtë superçështje me shumë nënçështje, ndërkohë që ligji kërkon fokus vetëm në një temë të veçantë. Ai ftoi opozitën ta rikthejë kërkesën të riformuluar.
Por opozita reagoi me akuza të ashpra. Tedi Blushi deklaroi se mazhoranca po shkel Kushtetutën dhe po tenton të mbyllë gojën e opozitës, duke penguar funksionimin normal të parlamentit. Ai e quajti refuzimin e mocionit shenjë frike nga përballja me dështimet dhe aferat e qeverisë Rama.
Debati mbeti i hapur, ndërsa palët duket se do të vazhdojnë përplasjen edhe në seancat e ardhshme.
About the Author
