Opozita ngre shqetësime për efektet që mund të ketë përfshirja e Shqipërisë, ndërsa Kryeministri thekson se vendimmarrja është bërë nga partnerët strategjikë
Ftesa e Shqipërisë për t’u bërë pjesë e Bordit të Paqes ka nxitur debat në seancën plenare të Kuvendit të Shqipërisë, mes deputetit të opozitës Fatmir Mediu dhe Kryeministrit Edi Rama.
Gjatë fjalës së tij, Mediu deklaroi se përfshirja e Shqipërisë në këtë nismë ndërkombëtare kërkon një analizë të thelluar për efektet që mund të sjellë në interesat kombëtare. Ai theksoi se Shqipëria ka një politikë të qartë në kuadër të NATO-s dhe procesit të integrimit në Bashkimin Evropian, ndërsa disa vende brenda dhe jashtë BE-së, përfshirë Britaninë e Madhe, kanë shprehur shqetësime për Bordin e Paqes.
Sipas Mediut, ajo që mund të ndodhë në Gaza mund të krijojë precedentë që të ndikojnë drejtpërdrejt interesat e Shqipërisë, si brenda vendit ashtu edhe në rajon. Ai u shpreh se, edhe pse mbështet në parim pjesëmarrjen në Bord, është e domosdoshme të vlerësohen pasojat që kjo nismë mund të ketë në çështje të ndjeshme, përfshirë edhe Kosovën.
Nga ana tjetër, Kryeministri Rama iu përgjigj kritikave duke deklaruar se priste që Mediu, në këtë rast, të mbante anën e Shteteve të Bashkuara dhe të Britanisë. Rama theksoi se nuk sheh divergjenca serioze në këtë proces dhe se analizat janë bërë nga vetë partnerët që kanë ftuar Shqipërinë të marrë pjesë në Bord.
Sipas Kryeministrit, Shqipërisë nuk i ka ardhur ende koha të analizojë ata që e kanë ftuar, duke nënvizuar se vendimi për përfshirje është marrë në përputhje me interesat strategjike dhe aleancat ndërkombëtare të vendit.
Debati në Kuvend pasqyron ndarjet politike mbi mënyrën e përfshirjes së Shqipërisë në nisma të reja globale, ndërsa çështja e Bordit të Paqes vijon të jetë një nga temat më të diskutuara të ditës në politikën shqiptare.
About the Author
