Mjeku që predikonte moral fetar, por jetonte me katër gra, shpallet fajtor për dhunë në familje pas hetimeve për lidhje me të miturën që e trajtonte si bashkëshorte.
Gjykata e Tiranës ka dënuar me 15 muaj burg kirurgun Dervish Hasi, pas një çështjeje të bujshme që tronditi opinionin publik për mënyrën si ai kishte abuzuar me një vajzë të mitur, të cilën e prezantonte si bashkëshorten e tij të katërt.
Hasi, i njohur për predikimet e tij fetare dhe për jetën familjare me tri gra të tjera, ishte marrë fillimisht i pandehur nën akuzën e pornografisë. Megjithatë, trupa gjykuese vendosi ta rikualifikojë akuzën në veprën penale “dhunë në familje”, duke e dënuar me 15 muaj heqje lirie.
Sipas dosjes gjyqësore, mjeku kishte krijuar një raport të përsëritur me vajzën që e kishte njohur që në moshën 14-vjeçare. Vajza frekuentonte banesën e tij disa herë në javë dhe dyshohet se mes tyre ka pasur marrëdhënie seksuale, çka do të konfirmohet përfundimisht nga akt-ekspertiza mjeko-ligjore.
Hetimet zbuluan se Hasi i referohej vajzës si “bashkëshortja e katërt”, duke justifikuar marrëdhënien me interpretim personal të normave fetare, ndërsa në fakt kishte shkelur ligjin dhe parimet etike të profesionit të tij si mjek.
Rasti ka shkaktuar indinjatë të gjerë në opinion, duke rikthyer në vëmendje mungesën e mbikëqyrjes institucionale ndaj abuzimeve që maskohen pas pretendimeve morale ose fetare. Gjykata theksoi se dënimi synon të japë një mesazh të qartë se asnjë justifikim nuk mund të legjitimojë dhunën dhe abuzimin ndaj të miturve.
About the Author
