Pas trazirave të shkaktuara nga vrasja e themeluesit të Inqilab Mancha, një drejtues i Partisë Kombëtare Qytetare plagoset me armë zjarri në Khulna
Dhuna politike dhe studentore në Bangladesh po thellohet pas vrasjes së liderit të ri Sharif Osman Hadi, themelues i grupimit radikal studentor Inqilab Mancha në Universitetin e Dhakës. Të hënën, më 22 dhjetor, një tjetër drejtues studentor është qëlluar me armë zjarri në qytetin Khulna, duke rritur frikën për përhapje të mëtejshme të trazirave.
Sipas autoriteteve lokale, persona të paidentifikuar kanë hapur zjarr ndaj Motaleb Shikder, drejtues rajonal i National Citizen Party dhe organizator qendror i strukturës NCP Sramik Shakti. Sulmi ka ndodhur rreth orës 11:45, ndërsa plumbi e ka goditur në zonën e kokës.
Policia ka bërë të ditur se Shikder është transportuar me urgjencë në Spitalin Universitar të Khulnës, ku ndodhet nën kujdes mjekësor. Sipas mjekëve, ai ka kaluar rrezikun për jetën, pasi plumbi ka hyrë nga njëra anë e veshit dhe ka dalë nga ana tjetër pa dëmtime fatale.
Ngjarja vjen vetëm pak ditë pas vrasjes së Sharif Osman Hadit, një figurë e njohur e aktivizmit studentor, e cila ka shkaktuar protesta, përplasje dhe incidente të dhunshme në disa qytete të vendit. Autoritetet po hetojnë lidhjen mes dy episodeve, ndërsa forcat e sigurisë janë vënë në gatishmëri për të parandaluar përshkallëzimin e mëtejshëm të situatës.
Situata në Bangladesh mbetet e tensionuar, me shqetësime serioze për stabilitetin dhe sigurinë publike, ndërsa thirrjet për qetësi dhe dialog po shtohen nga aktorë të ndryshëm politikë dhe shoqërorë.
About the Author
