Presidenti amerikan thotë se më e mira ende nuk ka ardhur, ndërsa Shtëpia e Bardhë refuzon të japë detaje
Presidenti i Shteteve të Bashkuara, Donald Tramp, ka njoftuar se do t’i drejtohet kombit me një fjalim të papritur nga Shtëpia e Bardhë, duke nxitur spekulime të shumta mbi përmbajtjen dhe qëllimin e deklaratës së tij. Lajmi u bë publik përmes platformës së tij Truth Social, ku Tramp konfirmoi se fjalimi do të mbahet në orën 21:00 sipas kohës lokale amerikane.
Në mesazhin e tij, presidenti 79-vjeçar u shpreh se ka qenë një vit i suksesshëm për Shtetet e Bashkuara dhe se, sipas tij, më e mira ende nuk ka ardhur. Megjithatë, ai nuk dha asnjë detaj mbi temën që do të trajtojë, duke e lënë njoftimin tërësisht në mjegull.
Edhe Shtëpia e Bardhë ka refuzuar të komentojë më tej mbi fjalimin, duke mos konfirmuar nëse Tramp do të flasë nga Zyra Ovale apo nga një ambient tjetër zyrtar. Nëse zgjedh Zyrën Ovale, ky do të ishte një nga rastet e rralla, pasi Tramp ka mbajtur vetëm dy fjalime të tilla që nga nisja e mandatit të tij të dytë.
Njoftimi vjen në një moment të ndjeshëm politik dhe mediatik për presidentin, pas kritikave të forta për reagimet e tij ndaj disa ngjarjeve të fundit, përfshirë deklarata të ashpra në rrjetet sociale që kanë shkaktuar reagime edhe brenda radhëve republikane.
Vetëm pak ditë më parë, Tramp kishte përdorur një event zyrtar në Shtëpinë e Bardhë për të paralajmëruar hakmarrje ndaj ISIS-it pas vrasjes së dy ushtarëve amerikanë dhe një përkthyesi civil në Siri, çka ka shtuar dyshimet se fjalimi i radhës mund të ketë lidhje me sigurinë kombëtare ose politikën e jashtme.
Për momentin, përmbajtja e adresimit mbetet e panjohur, ndërsa vëmendja publike dhe mediatike është përqendruar te fjalimi i paralajmëruar, i cili pritet të ndiqet me interes të madh si brenda SHBA ashtu edhe në arenën ndërkombëtare.
About the Author
