Dosjet e reja tregojnë se ish-kryeministri izraelit dhe bashkëshortja e tij kanë qëndruar disa herë në apartamentin e financierit në Nju Jork, edhe pas dënimit të tij penal
Dokumente të sapobëra publike nga Departamenti i Drejtësisë i SHBA-së kanë hedhur dritë mbi marrëdhënien e afërt mes ish-kryeministrit të Izraelit, Ehud Barak, dhe financierit të ndjerë Jeffrey Epstein. Sipas këtyre materialeve, Barak dhe bashkëshortja e tij, Nili Priel, kanë qëndruar disa herë në një apartament të Epstein në Nju Jork.
Lidhja e Barak me Epstein ishte e njohur më herët, por dokumentet e publikuara së fundmi nga Department of Justice ofrojnë detaje të reja mbi nivelin e afërsisë mes tyre. Ato tregojnë se kontaktet dhe vizitat kanë vijuar edhe pas vitit 2008, kur Epstein u dënua për shkelje seksuale pas një marrëveshjeje të diskutueshme pranimi faji.
Në një email të majit 2017, Nili Priel informon Epstein se ajo dhe Barak planifikonin të largoheshin nga apartamenti për disa ditë për të udhëtuar drejt Harvardit dhe e pyet nëse mund të dërgohej një pastruese gjatë mungesës së tyre. Epstein, sipas dokumenteve, ia përcolli kërkesën një personi tjetër dhe e siguroi Priel-in se pastruesja do të ishte e pranishme të nesërmen.
Korrespondenca e publikuar përfshin edhe email-e nga asistentja e Epstein-it, Lesley Groff, ku flitet për koordinimin e ndërrimit të dekoderit kabllor dhe instalimin e një Apple TV në apartamentin ku qëndronte çifti Barak. Dokumentet tregojnë gjithashtu komunikime të shpeshta mes Priel dhe Epstein për organizimin e vizitave dhe takimeve të Barak në Nju Jork.
Nga ana e tij, Ehud Barak ka pranuar se ka pasur një marrëdhënie personale me Epstein, por ka deklaruar publikisht se nuk ka qenë kurrë dëshmitar apo pjesëmarrës në ndonjë sjellje të paligjshme ose të papërshtatshme nga ana e tij.
About the Author
