Nga ringu i WWE te Hollywoodi, aktori tregon se si fama dhe suksesi financiar nuk mjaftuan për ta ndjerë veten artistikisht të plotësuar
Aktori i njohur Dwayne Johnson, i njohur për publikun botëror si The Rock, ka folur hapur për periudhën më sfiduese dhe njëkohësisht zhgënjyese të karrierës së tij në aktrim, pas kalimit nga wrestling-u në Hollywood.
Në një intervistë për The Hollywood Reporter, Johnson u ndal te fillimet e tij në kinema, duke kujtuar debutimin në filmin The Mummy Returns në vitin 2001. Në atë kohë, ai ishte tashmë një emër i madh në WWE, por aspak i sigurt për të ardhmen si aktor.
Ai tregoi se xhirimet e para, të realizuara në shkretëtirën e Saharasë, ishin jashtëzakonisht të vështira fizikisht, pasi ishte sëmurë dhe përballonte temperatura ekstreme. Megjithatë, momenti kur u tha “Cut” pas skenës së parë, ishte vendimtar për të. Sipas tij, aty e kuptoi se aktrimi ishte ajo që donte të bënte për gjithë jetën.
Megjithëse më pas u shndërrua në një nga aktorët më të paguar dhe më fitimprurës të Hollywood-it, me role në filma si Jumanji, Hobbs & Shaw dhe Red Notice, Johnson pranoi se pas disa vitesh nisi të ndjente një boshllëk profesional.
Ai tha se rreth shtatë apo tetë vite më parë filloi të ndiente një zë të brendshëm që e pyeste vazhdimisht se çfarë vinte më pas, duke e shtyrë të kërkonte role më sfiduese dhe më të thella, përtej suksesit komercial.
Kjo dëshirë për ndryshim, sipas Johnson, u përmbush më në fund me rolin e luftëtarit të MMA-së Mark Kerr në filmin The Smashing Machine, një interpretim që i ka sjellë vlerësime të forta kritike dhe madje ka ndezur diskutime për një nominim të mundshëm në Oscar.
Rrëfimi i Dwayne Johnson tregon se edhe në majat e suksesit, kërkimi për kuptim dhe sfidë artistike mbetet një betejë personale për shumë figura të mëdha të kinemasë.
About the Author
