Parlamenti pritet të zhvillojë sot një ditë të ngarkuar me debate politike dhe raportime institucionale, ku në qendër të vëmendjes është kërkesa për shkarkimin e Niko Peleshit nga posti i Kryetarit të Kuvendit.
Kuvendi i Shqipërisë do të mbajë sot dy seanca të njëpasnjëshme, në një ditë që pritet të shoqërohet me diskutime të nxehta politike. Seanca e parë, e planifikuar të nisë në orën 10:00, do të fokusohet në shqyrtimin e “Projektvendimit për kërkesën për shkarkimin e Kryetarit të Kuvendit, Niko Peleshi”. Kjo kërkesë është paraqitur nga një grup deputetësh që e akuzojnë atë për “shkelje të rënda të rregullores parlamentare dhe mungesë paanësie në drejtimin e seancave”.
Ndërkohë, në orën 11:30, do të nisë seanca e dytë, ku do të raportojnë një sërë institucionesh të rëndësishme shtetërore për veprimtarinë e tyre gjatë vitit 2024. Mes tyre janë Këshilli i Lartë i Prokurorisë (KLP), Autoriteti i Mediave Audiovizive (AMA), Radio Televizioni Shqiptar (RTSH), Instituti i Statistikave (INSTAT), Avokati i Popullit dhe Komisioneri për Mbikëqyrjen e Shërbimit Civil.
Në përfundim të raportimeve, Kuvendi do të kalojë në shqyrtimin e disa projektligjeve të parashikuara në rendin e ditës. Debatet për shkarkimin e Peleshit dhe analizat mbi punën e institucioneve pritet ta kthejnë këtë të mërkurë në një nga seancat më intensive të këtij sesioni parlamentar.
About the Author
