Plani për pushtimin e ishullit Gonâve u përgatit për gati një vit; dy të pandehurit përballen me burgim të përjetshëm
Dy të rinj nga Teksasi, Gavin Rivers Weisenburg (21 vjeç) dhe Tanner Christopher Thomas (20 vjeç), janë paditur në SHBA për një komplot ekstrem që synonte pushtimin e ishullit Gonâve në Haiti. Sipas dokumenteve federale, ata kishin planifikuar të udhëtonin me varkë drejt ishullit, të vrisnin të gjithë meshkujt dhe të skllavëronin gratë dhe fëmijët për qëllime seksuale.
Hetuesit federalë thonë se të dy kishin përgatitur sulmin për afro një vit, nga gushti 2024 deri në korrik 2025, duke marrë kurse të gjuhës kreole, trajnim zjarrfikësie e madje edhe duke hyrë në Forcën Ajrore të SHBA me synimin që aftësitë ushtarake të shfrytëzoheshin për grushtin e shtetit. Në këtë periudhë, ata thuhet se janë përpjekur të rekrutojnë persona të tjerë, si në internet ashtu edhe fizikisht, për të marrë pjesë në plan.
Prokuroria ngre ndaj tyre akuza për konspiracion për vrasje dhe rrëmbim në një shtet të huaj, si dhe prodhim të materialeve seksuale me të mitur, pasi dyshohet se kanë detyruar një të mitur të kryejë akte seksuale për videoxhirime në gusht 2024. Ishulli Gonâve ka rreth 87 mijë banorë, dhe sipas akuzës, synimi ishte marrja e tij me forcë.
Weisenburg u arrestua më 3 korrik 2025, ndërsa për Thomas ende nuk ka të dhëna publike mbi ndalimin e tij. Nëse shpallen fajtorë, të dy rrezikojnë burgim të përjetshëm për akuzën kryesore dhe 15–30 vite burg për prodhim të pornografisë me të mitur.
Rasti po hetohet nga FBI, Zyra e Hetimit të Forcave Ajrore të SHBA dhe Policia e Salinas. Procedurat gjyqësore janë në zhvillim.
About the Author
