Produksioni pezullon televotimin për dhjetë banorë, ndërsa dyshimet e publikut përqendrohen te Rogerti dhe Keijsi pas sjelljeve të fundit brenda shtëpisë
Shtëpia e Big Brother VIP Albania është përfshirë nga një situatë e pazakontë, pasi dy zarfe të zinj kanë mbërritur në lojë, duke sjellë anulimin e menjëhershëm të televotimit për dhjetë banorët në nominim.
Në një njoftim zyrtar, produksioni bëri të ditur se Vëllai i Madh ka marrë masa, të cilat do të bëhen publike gjatë spektaklit, pa dhënë ende sqarime për arsyet që çuan në këtë vendim. Kjo ka krijuar paqartësi dhe ka nxitur spekulime të shumta si mes banorëve, ashtu edhe te publiku.
Banorët që ndodheshin në televotim janë Angelo, Artani, Keijsi, Juela, Greta, Krusita, Rogerti, Mal, Miri dhe Mateo.
Vëmendja e ndjekësve është përqendruar kryesisht te Rogerti, pas një ofendimi të drejtpërdrejtë ndaj Malit që përfshiu edhe familjen e tij, si dhe te Keijsi, pas një përplasjeje me Stenaldon, ku u bë një pyetje e konsideruar e papërshtatshme lidhur me Baby G.
Situata ka rritur ndjeshëm tensionin në shtëpi dhe ka krijuar pritshmëri të lartë për spektaklin e radhës, ku pritet të zbulohet se cilët banorë do të preken nga vendimi i Vëllait të Madh dhe si do të ndryshojnë balancat e lojës.
About the Author
