Një nënë e pesë fëmijëve biologjikë kthen pasionin për kukullat hiperrealiste në një biznes fitimprurës që ndjeket nga mijëra vajza dhe gra në mbarë botën
Gina Kasoff, një grua rreth të dyzetave nga Misuri, është bërë një nga figurat më të pazakonta të rrjeteve sociale, duke ndërtuar një karrierë shumë fitimprurëse nga një pasion që për shumëkënd duket i çuditshëm. Ajo është nënë e pesë fëmijëve të rritur, por në jetën e përditshme kujdeset edhe për 20 foshnja që nuk janë reale, por kukulla hiperrealiste të njohura si Reborn Dolls.
Këto kukulla, të punuara me silikon dhe vinil nga artistë të specializuar, duken pothuajse identike me foshnjat e vërteta dhe kushtojnë nga disa mijëra deri në dhjetë mijë dollarë secila. Gina i trajton ato si personazhe me emra, zëra dhe personalitete, duke krijuar video me rutina ditore, dalje në dyqane, festa dhe skena familjare.
Pavarësisht kritikave të ashpra në internet, ku përshkruhet si e frikshme apo e çuditshme, Gina ka arritur të fitojë mbi 200 mijë dollarë në vit vetëm nga YouTube. Kanali i saj u monetizua brenda pak javësh dhe sot numëron dhjetëra mijëra ndjekës, kryesisht vajza të vogla dhe gra që gjejnë tek përmbajtja e saj një formë argëtimi dhe ngushëllimi.
Ajo shprehet se kukullat nuk janë zëvendësim i fëmijëve të vërtetë, por një formë loje dhe kujdesi emocional, e cila për disa shërben edhe si terapi pas humbjes, infertilitetit apo vetmisë. Gina thekson se nuk ka shpërdorim ushqimi apo sendesh, pasi gjithçka ripërdoret ose dhurohet pas xhirimeve.
Ndërsa një pjesë e publikut vazhdon ta gjykojë, Gina mbetet e bindur se pasioni i saj nuk është më i çuditshëm sesa hobet e tjera të të rriturve që pranohen lehtësisht nga shoqëria. Ajo e sheh veten si një krijuese përmbajtjeje që sjell qetësi, fantazi dhe ngrohtësi për ndjekësit e saj, duke kthyer një lojë fëmijërie në një histori suksesi financiar.
About the Author
