Në një intervistë, miliarderi pranon se angazhimi në Departamentin e Efiçencës Qeveritare nën administratën Tramp e dëmtoi fokusin e tij te Tesla dhe SpaceX
Elon Musk ka pranuar se i vjen keq që mori drejtimin e Departamentit të Efiçencës Qeveritare (DOGE) në SHBA, duke thënë se periudha e tij në administratën Tramp ishte vetëm pjesërisht e suksesshme dhe nuk ia vlejti kostot që pati ndaj kompanive të tij. Në një intervistë në podcastin e Katie Miller, ish-zëdhënëse e agjencisë, CEO i Tesla dhe SpaceX tha se nuk do të e përsëriste atë hap nëse do t’i jepej mundësia.
Ne ishim pak të suksesshëm, disi të suksesshëm, u shpreh Musk, por kur u pyet nëse do ta bëntë sërish, ai u përgjigj duke thënë se do të kishte zgjedhur të qëndronte i fokusuar te bizneset e tij. DOGE u mbyll nga Shtëpia e Bardhë muajin e kaluar, pas polemikave mbi qasjen e shpejtë në të dhënat federale dhe masat agresive për shkurtime shpenzimesh. Musk u largua nga pozita në pranverë, ndërkohë që konsumatorë kundërshtues organizuan protesta, ku disa djegën makina Tesla.
Megjithëse periudha e tij në qeveri ishte e trazuar, Musk mbrojti misionin e DOGE, duke thënë se ekipi zbuloi rreth 200 miliardë dollarë në pagesa të panevojshme, që sipas tij mund të eliminoheshin përmes automatizimit. Shifra ishte dukshëm më e ulët se pretendimet fillestare për kursime trilionshe nga reforma e sistemit federal.
Intervista 50-minutëshe trajtoi edhe tema të tjera, përfshirë inteligjencën artificiale, rrjetet sociale dhe industrinë e modës. Ndërkohë, sipas Newsweek, Tesla ka miratuar një paketë kompensimi që mund ta bëjë Musk njeriun e parë trilioner, duke forcuar bindjen e tij se koha e kaluar në qeveri e largoi nga prioritetet kryesore biznesore.
About the Author
