Përmes një deklarate publike, familjarët kërkojnë empati, ndalim të gjykimeve dhe shprehin mbështetje të plotë për Albën në çdo vendim të saj
Familja e Alba Pollazhanit ka reaguar për herë të parë publikisht lidhur me situatat dhe komentet e shumta që kanë shoqëruar pjesëmarrjen e saj në BBVK. Përmes një postimi në rrjetet sociale, familjarët kanë bërë thirrje për qetësi, empati dhe ndalim të paragjykimeve, duke theksuar se publiku nuk e njeh të vërtetën e plotë të asaj që përjetohet brenda formatit.
Në reagim theksohet mbështetja e pakushtëzuar për Albën, duke nënvizuar se ajo ka qenë e sinqertë, e drejtpërdrejtë dhe vetvetja në çdo moment. Familja shprehet se çdo zgjedhje apo vendim i saj do të respektohet dhe mbështetet, pavarësisht rrjedhës së lojës apo perceptimit të jashtëm.
Familjarët e konsiderojnë të padrejtë dhe absurd gjykimin e situatave personale që ndodhin brenda një formati argëtues, duke kujtuar se ngjarje të tilla ndodhin edhe në jetën reale dhe nuk mund të analizohen në mënyrë sipërfaqësore. Ata theksojnë se askush nuk ka të drejtë të gjykojë mënyrën se si dikush zgjedh ta jetojë jetën e vet.
Në deklaratë dënohen ashpër komentet fyese, bullizuese dhe denigruese në rrjetet sociale, të cilat sipas familjes nuk përfaqësojnë vlera shoqërore dhe dëmtojnë jo vetëm personin në qendër të vëmendjes, por edhe klimën publike në përgjithësi.
Familja thekson gjithashtu se Alba nuk i jep llogari askujt për jetën e saj personale dhe se fenomene si tradhtia apo dhuna nuk duhet të normalizohen, pavarësisht se ndodhin shpesh edhe jashtë formatit televiziv.
Në fund të reagimit, familjarët falënderojnë të gjithë ata që e kanë mbështetur Albën, duke theksuar se mbështetja e publikut ka qenë një forcë shtytëse e rëndësishme dhe një motivim i madh për të ecur përpara, deri në fazën finale të garës.
About the Author
